Countdown a cuminsa pa “Paranda di Bochincha”

ORANJESTAD− Awe, 28 di october, ta exactamente 1 luna prome cu e tan spera “Paranda di Bochincha” y pa celebra esaki, Cruz Cora Aruba a tene su countdown party hunto cu prensa, invitadonan di Sonrisa y voluntarionan na edificio di Sonrisa na Meiveld. Dia 28 di november, e Paranda di Bochincha lo tuma lugar, un parada di truck unda tur persona cu limitacion por participa. Cu e evento aki, Cruz Cora ta purba trece tur e personanan aki mas serca di comunidad, mustra cu nan tambe t'ey. Esaki pa pone enfasis riba e Dia Internacional pa Persona cu Limitacion.

RUTA

E ruta pa Paranda di Bochincha 2015 ta: Salida 2pm for di Compleho Deportivo Jara na Savaneta- Savaneta-Cura Cabai-Bernhardstraat-Springfield-Pastoor Hendrikstraat-Rotonde Filomena College-Weg Seroe Preto-Grot di Lourdes-Crusada Weg Seroe Blanco-Brazil-y yega bek Compleho Deportivo Jara.

Cruz Cora ta pidi tur mayor of representante di un persona cu kier participa, pa por fabor yama nos y inscribi na tel. 582-2219 mas pronto cu ta posibel.

REGISTRACION DI TRUCK

Tambe nos ta pidi tur compania cu tin truck of esunnan particular pa yama nos pa registra. Mas truck nos por conta cu ne, mas lugar nos por ofrece nos invitadonan.

Paranda di Bochincha no por existi sin e sosten di tur su sponsors y voluntarionan. Cada aña e grupo di sponsors ta bira mas grandi y por casi bisa cu e actividad ta wordo carga pa tur e partners aki. Nan entusiasmo pa e proyecto ta haci’e posibel y p'esey Cruz Cora Aruba kier yama DANKI na: Aruba Airport Authority, Valero Marketing & Supply, Diario, Prographics, Interprint, ClickPrint, Magic FM, Power FM, Hits 100 FM, Galactica FM, Aledda N.V., Manrique Capriles, Red Sail Sports, Fundacion Clinton Whitfield, La Cabana Beach & Racquet Club, Holiday Inn Hotel, SuperFood, Bright Bakery, Evelien van Dijk, Erlinda Leysner, Martica Arends, Marieta Wanopa, Sharlene Bitorina, Panaderia del Pueblo, Hot Ones Band, Freezone Aruba, Oduber Agencies, Compra-Tropic Ale, Compleho Deportivo Jara y na tur otro silent sponsors. Masha masha danki pa boso entusiasmo y sosten. Danki na Team Bochincha.