ATIA ta celebra 70 aña cu “Annual Corporate Event”

ORANJESTAD – Manera ta conoci, anualmente Aruba Trade and Industry Association (ATIA) ta organisa nan “Annual Corporate Event” y e aña aki den conexion cu nan 70 aniversario sigur nan a prepara un tremendo evento pa tur miembro como tambe henter comunidad di Aruba. Durante e conferencia di prensa, directora interino di ATIA, Srta. Kimberly Boekhoudt a anuncia Sra. Ronnie Goldberg como e orado invita pa e evento aki cu lo tuma luga november 27, na Aruba Marriott Ballroom cuminsando 7’or di anochi.

TEMA PRINCIPAL

E tema principal di e anochi lo ta “Labor Market Flexibility” unda cu Sra. Ronnie Goldberg kende ta fungi actualmente como ‘Regional Vice-President of the International Organization of Employers (IOE) for North America’, lo elabora extensamente riba e topico aki den su presentacion, sigui pa un recepcion cu Robert Jeand’or y su Solo Banda Show.

ATIA SU PAPEL IMPORTANTE

No tin duda cu ATIA ta hunga un papel importante den nos comunidad principalmente na momento di vocifera y proteha e interes di e miembronan y gremio comercial di Aruba, p'esey tambe e organisacion a dicidi pa invita un experto den e tereno di mercado laboral pa comparti su conocemento cu e comunidad di Aruba. “Mirando cu e topico y cambio di nos ley laboral ta un debate cu ta tumando luga den actualidad, nos ta sigur cu esaki ta momento indica pa trece un orado cu experiencia y conocemento manera Sra. Goldberg”, asina Srta. Boekhoudt, directora interino di ATIA a expresa durante di e conferencia.

INVITACION PA EVENTO CORPORATIVO

ATIA ta extende un cordial invitacion na henter e gremio comercial y miembro nan di ATIA mes pa forma parti di e “Annual Corporate Event” cu ta un iniciativa pa trece hunto e comunidad comercial di Aruba y na mes momento recauda fondo pa e asociacion.