FTA: A reuni cu tur fraccion di parlamento riba ley 1613x

ORANJESTAD - Sindicato FTA a reuni cu tur 3 fraccion den parlamento di Aruba riba e intencion di gobierno pa elimina e articulo 1613x di Codigo Civil, cual ta un stipulacion cu ta proteha e clase trahador di mal uzo di e posibilidad legal di cera contractnan di corto duracion. Manera cu FTA ya a duna di conoce di forma hopi amplio den su rueda di prensa y tambe via diferente otro medio di comunicacion, e stipulacion aki di Codigo Civil ta un proteccion esencial pa e clase trahador aki na Aruba y ta fomenta stabilidad laboral. Eliminacion di e articulo aki segun FTA, lo trece e trahador den un posicion dificil, specialmente esnan cu den futuro lo mester subi e mercado laboral y of ta haya nan ta cambia di trabou.

LUCHA RIBA DIFERENTE FRENTE

FTA a scoge pa cuminsa un lucha riba diferente frente pa asina salvaguardia e interesnan di e clase trahador. A cuminsa cu un campaña intensivo di concientizacion di e pueblo trahador riba e consecuencianan di eliminacion di e proteccion den Codigo Civil. E campaña aki a inclui tambe dunamento di informacion na e demas sindicatonan di Aruba, como cu nan miembronan, sea di forma directo of indirecto, tambe lo wordo afecta severamente door di e eliminacion di articulo 1613x. Adicionalmente FTA a acerca organizacionnan sindical internacional manera Confederacion Sindical di America y Confederacion Sindical Internacional kendenan tambe a mustra nan respaldo pa e posicion firme cu FTA a tuma den nomber di e trahadornan di Aruba.

OBHECION DI FTA

Durante e reunionnan cu a tuma lugar cu e lidernan di fraccion den parlamento, FTA a informa nan ampliamente di su posicion pa cu e intencion di Gobierno. FTA a trece dilanti kico ta su obhecionnan relaciona cu e proposicion pa elimina e articulo di Codigo Civil y na mes momento a splica den detaye kico ta e posibel consecuencianan cu tanto e pueblo trahador, pero tambe e economia di Aruba en general lo sufri si acaso e stabilidad laboral unico cu nos ta disfruta di dje ya pa mas di 20 aña caba, wordo elimina. Tanto e fraccionnan den oposicion di MEP y PDR, como tambe e fraccion di AVP cu ta sostene e Gobierno actual, a mustra solidaridad total cu e punto di salida y posicion di FTA pa cu eliminacion di articulo 1613x. Tur a remarca cu e posibel bentahanan cu algun parti di e forza laboral lo por saca for di eliminacion di e stipulacion aki no ta pisa mas cu e enorme consecuencia y desventaha cu lo crea pa e clase trahador den su totalidad. Mescos cu FTA, tur fraccion ta di acuerdo cu si acaso por demostra cu cifra y estudionan concreto y detaya cu ahuste nan di legislacion ta necesario pa yuda cierto gruponan den nos comunidad, esaki logicamente lo mester wordo evalua, pero eliminacion di e articulo for di Codigo Civil no ta posibel bou niun circumstancia, teniendo na cuenta e consecuencianan devastador cu esaki lo tin pa e stabilidad laboral na Aruba.

SATISFECHO PERO CU CAUTELA

FTA, aunke satisfecho cu e resultado di e esfuerzonan haci te na e momento aki, lo continua cu su campaña di concientizacion di e clase trahador pa e importancia di articulo 1613x, en todo caso te na momento cu ricibi confirmacion di parti di minister di labor cu articulo 1613x lo wordo manteni como parti di e Codigo Civil