PWC: Traha un presupuesto: Nos tur mester traha un!

Posted on 10/27/2015, 11:53 PM AST | Updated on 10/28/2015, 12:16 AM AST

ORANJESTAD - Bo kier sa si bo tin suficiente placa pa cumpra e cosnan cu bo kier of cu bo mester? E contesta riba e pregunta aki ta hopi simpel si bo traha cu un plan. Asina bo sa di antemano si bo tin placa pa e cosnan cu bo mester y e cosnan cu bo ta desea. Un plan asina yama un ‘presupuesto’.

Un presupuesto ta consisti di dos parti:

Entrada: Cuanto placa bo ta haya durante cierto temporada. E suma aki bo ta pone na banda robes di e presupuesto. Gasto: Cuanto placa bo ta bai gasta. E suma aki bo ta pone na banda drechi di e presupuesto.

Tur entrada mester wordo conta hunto y tur gasto mester wordo conta hunto. E resultado bo ta pone ful abou di bo presupuesto como ‘entrada total’ y ‘gasto total’. Si ambos banda di e columna ta igual, bo tin un presupuesto balansa.

Tin dos sorto di gasto: 

Gastonan fiho: Esaki ta gastonan cu bo tin tur luna manera huur, hipoteca y fiansanan Gastonan Variabel: Gastonan cu ta cambia tur luna.

Tin dos sorto di gasto variabel:

Gastonan cu ta necesario: Esaki ta costo di cosnan cu bo tin mester di nan manera, awa, coriente, comestibel. Gastonan cu ta opcional: Esaki ta costo di cosnan cu no ta un necesidad primordial, manera caarchi pa cinema of gasto di telefon. Si e gastonan total ta mas cu e entrada total, bo presupuesto ta for di balansa. Bo ta sacando mas placa di loke bo tin na entrada y esaki no por.

Tips

Con bo ta yega na un presupuesto balansa? 

Trata na minimalisa bo gastonan cu ta opcional. Baha bo gastonan cu ta necesario: uza bo telefon menos y no gasta awa y coriente pa loco. Uza bo placa cu bo a spaar solamente den casonan di emergencia Si bo gastonan ta menos cu bo entrada y bo ta resta placa fin di luna, bo por spaar loke resta. Purba semper pa spaar placa y asina logra bo metanan na termino largo. Por ehempel, bo por spaar pa un tablet, telefon nobo of paña nobo. Uza bo placa pa cosnan cu bo mester di berdad. Si despues bo ta resta placa, bo por gasta esaki na e cosnan cu bo ta desea.

Ehempel di un presupuesto balansa

 

PwC Aruba ta sigui cu e proyecto Earn Your Future, bishitando scolnan tur rond di Aruba. E esencia di e programa Earn Your Future di PwC Aruba ta pa siña e muchanan con pa maneha nan placa y con pa spaar. Den esaki e muchanan lo siña cu tin cosnan cu ta necesario y tin cosnan cu no ta necesario y con pa pone nan prioridadnan. E aña aki alrededor di 20 scol ta participando y tin entre 26 pa 28 trahado di PwC Aruba riba e proyecto aki cu ta tuma dos mainta y dos les uur di cada scol. PwC Aruba ta busca formanan pa sigui aporta na comunidad y specialmente na e hubentud di Aruba.