Wondenpoli na hospital a bira “Center for Advanced Wound Care”

ORANJESTAD – E wondenpoli na hospital a bira “Center for Advanced Wound Care”. Esaki a sosode durante un simposio recien organisa. E wondenpoli ta un centro renombra cu ta traha cu specialistanan y docternan di cas pa tratamento di herida di pashentnan. Heridanan cronico ta un problema hopi grandi na Aruba y ta necesario pa keda na altura di tur e ultimo desaroyonan riba tereno di cuido, segun Dr. Yuri Casseres cu ta algemeen chirurg y Medisch Coördinator di Wondenpoli.

E SIMPOSIO

E simposio tabatin alrededor di 200 participante cu ta labora den cuido medico y tabata uno di nivel halto y a subraya e trato cu dedicacion pa herida cura mas lihe cu ta posibel. Organisadonan a prepara un programa bon balansa, cu entre otro oradornan for di Merca, specialistanan di Aruba, Podotherapeut, Revalidatiearts pa cubri tur e diferente aspectonan di cuido di herida. A comparti cu diferente profesionalnan medico di Aruba y di otro paisnan den region e ultimo tecnicanan y tecnologia pa cu cuido di heridanan cronico, Dr Casseres a splica.

EZZARD CILIÉ

Director medico di Hospital sr. Ezzard Cilié a añadi cu educacion, pa medio di organisa simposionan, ta importante particularmente den caso di e policlinica di herida, cu ta traha – manera Minister Dr. Alex Schwengle a menciona – den un forma integral cu specialistanan y dokternan di cas. Cilié tambe a comenta cu e concepto di Wondenpoli di Aruba a wordo tuma over pa otro paisnan caba, pasobra nan ta wak beneficio na e forma cu Aruba ta maneha esaki. Pa hopi tempo caba e centro tabatin un funcion hopi mas extenso cu un policlinica di herida normal y a dicidi pa cambia su nomber pa Center for Advanced Wound Care anunciando esaki durante e simposio aki. E nomber aki ta refleha cu e ta mas cu un policlinica pa herida, pero un centro pa cuido di heridanan avansa cu un servicio y tratamento specialisa, Sr. Cilié a conclui bisando.

CAMBIO DI NOMBER

Dr. Casseres ta comenta cu e cambio di nomber ta hiba e policlinica na un nivel mas halto como centro di excelencia den Caribe, unda cu profesionalnan di otro islanan por bin pa siña con aki na Aruba ta trata y maneha herida. E specialista a agrega cu e concepto di tratamento cu ta uzando na Aruba ta unico pa e region aki. Cu e cambio di nomber pues a tuma un paso mas pa haci e centro mas conoci internacionalmente.