Grua ‘state-of-the-art’ pa maneha carga ta riba su railnan

ORANJESTAD – E grua ‘state-of-the-art’ pa maneha carga ta riba su railnan. Siman pasa a logra un berdadero “milestone” importante den henter e proceso di construccion y infrastructura pa cu e mudamento di e waf di carga for di Oranjestad pa Barcadera, cu e “skidding” y instalacion di e Gantry Crane nobo. E Paceco Gantry Crane ta riba su “rails” riba waf y a cuminsa awor cu e conexion di componentenan electronico.

ACUERDO

Na augustus aña pasa Aruba Stevedoring Company (ASTEC N.V.) a cera un acuerdo na Spaña cu e compania Paceco España S.A. relaciona cu e adkisicion di un grua “Ship-To-Shore (STS) Crane” pa uzo riba e terminal multi-cargo na waf di Barcadera. Aunke Paceco tin referencianan den region, esaki ta e prome contract "overseas" cu e compania Paceco ta cera pa e tipo di grua moderno aki, despues di a concentra su servicionan solamente den Europa. Awor, Aruba a bira e prome isla cu cual nan a cera un acuerdo pa e tipo di grua moderno aki.

CONSTRUI NA ARUBA MES

A construi e grua na Aruba mes, den forma di un diseño "twin box boom" cu un alcance di 39 meter y 20 meter di rail. E maximo di capacidad di carga lo ta di 40 ton bou di “spreader” y 53 ton bou di e “hook”. Ta bon pa agrega cu e “Gantry track rails” tabata di 200 m na Oranjestad, pero awor ta conta cu 300 m di largura na Barcadera, cu ta duna mas acceso pa brinda servicio na barconan. Mas ainda e ta mobilisa den forma electrico, pues a tene cuenta cu aspectonan di medio ambiente y sostenibilidad.

GRUA SOSTENIBEL Y DURADERO

A tuma e medidanan necesario den e fase di diseño y construccion pa sigura miho rendimento, sostenibilidad y durabilidad di e grua y su componentenan, cual ta exponi na bientonan fuerte y corosivo di Aruba y e radiacion UV extremo durante e 25 añanan pronostica di bida di e grua. ASTEC N.V. ta convenci cu Paceco España S.A. ta e socio corecto pa muda e waf di carga pa Barcadera.

SKIDDING DI GRUA

“Skidding” di e grua ta nifica ta lora e grua cuidadosamente for di su ubicacion unda cu a arm'e pa posicion'e riba e railnan cu ta hancra riba e pier. Pa move e grua cu ta pisa 850 ton for di un punto pa otro y mont’e riba e railnan tabata un otro punto critico y un proyecto riba su mes, cu planning meticuloso y ehecucion cu a rekeri atencion completo di tur esunnan envolvi. Cu e proceso aki completa, e terminal pa carga ta un paso mas cerca di por cuminsa operacion.

TEST

Ora cu e conexionnan keda cla lo cuminsa test e Gantry Crane nobo y asina cu tur sistema ta funcionando manera mester ta, ASTEC lo cuminsa cu e training di su operadornan di grua.