Rosario College implementando Conscious Discipline

ORANJESTAD - Rosario College ta implementando Conscious Discipline. Monique Arango-Trapenberg ta cabesante di Rosario College, un basisschool cu ta cay bao maneho di SKOA, a completa e curso di introduccion y implementacion di Kerndoelen (metanan nucleo) caba y a experiencia esaki como un “eyeopener” y un “houvast”, segun Arango Trapenberg ta splica.

WERELD IN GETALLEN

E scol ta uzando e metodo di matematica “Wereld in Getallen” caba di basta tempo y esaki mes tambe ta brinda un bon guia di progreso y rekisitonan di klas pa klas.

Rosario College tambe tabata na e curso di Conscious Discipline y a implementa diferente elemento di e metodo Conscious Discipline caba. E scol ta sigui expande e programa cu ta dunando bon resultado.

CONSCIOUS DISCIPLINE

Conscious Discipline ta hopi amplio y tin hopi elemento, naturalmente no ta logra implementa tur den un solo biaha, Arango-Trapenberg ta comenta. El a agrega cu na Rosario College ta haciendo bon uzo di e programa pa trata cu e muchanan, pa compronde nan y yuda nan saca lo miho di nan.

Como maestro bo ta traha cu hende y cada uno tin su caracter, cada un tin su “bagage” cu e ta bin cu ne for di cas y e maestro pues mester por anda cu diferente sorto di mucha. Pa medio di diferente tactica cu nan ta siña e maestro por “verdiep” su mes mas den con pa anda cu e muchanan y inclui nan, no pone nan un banda. Arango-Trapenberg a splica cu ta traha cu nan comportacion, con nan ta siña y ta considera ki situacion cu nan por ta aden na diferente momento pa yuda nan saca e miho di nan mes.