Mike Eman: Posibel solucion na impasse e siman aki

ORANJESTAD – No tin ningun novedad riba e asunto di presupuesto. Premier Mike Eman a bisa NoticiaCla dialuna atardi, cu e ta spera cu e siman aki lo tin un claridad riba e situacion di presupuesto y cu e siman aki e ta spera cu lo por sali for di e impasse cu tin ainda. E no a papia ainda cu gobernador cu a bolbe diasabra, segun e mes a declara na NoticiaCla dialuna atardi. Mes momento a mustra cu lo delibera den conseho di minister diamars pa mira si ta bay dicidi cu ta duna ‘inzage’ na cifranan di departamentonan pero ‘onder voorbehoud’ pa evita cu mal informacion ta wordo usa cu na final ta pinta un plachi cu no ta e realidad. Algo cu a sosode caba segun e mandatario, ora cu nan a haya e quickscan di College Financieel Toezicht recientemente. Eman ta para ariba cu e cos aki no tabata corecto y cu ainda e no por haya su mes den e pensamento kico tur a pasa. Sigur no despues di tur loke e la envisiona pa loke ta e relacion cu Reino Hulandes tur e tempo aki.

Manera NoticiaCla a raporta mas prome dialuna, gobernador ta bek na Aruba for di diasabra, pero ainda no tin ningun informacion oficial a sali for di su despacho. Informacion cu NoticiaCla a haya, ta cu pa aworaki no tin ningun informacion cu ta cla pa wordo duna publicamente ainda. Mes momento contactonan di minister hulandes Ronald Plasterk a informa cu ‘tur cos ta sigui normal’, den sentido cu e bishita di gobernador na Hulanda no a cambia e situacion di e investigacion pa nada.”Nada no a cambia” ta e contesta cu NoticiaCla a haya for di Hulanda dialuna. Esaki ta nifica cu College Financieel Toezicht ta continua cu su investigacion y cu e ultimo siman di augustus, lo presenta e rapport final.

Esaki no ta kita afo cu rumornan ta circula formal pafo, y entre nan cu gobernador lo a bin cu un deal for di Hulanda. Tur esaki sinembargo no ta verifica y como tal, oficialmente no tin base di berdad.