Number di auto nobo pa 2015 a caba temporalmente

ORANJESTAD – Number di auto pa 2015 a caba temporalmente. Vocero di Departamento di Impuesto (DIMP) Meverly Romano a confirma pa NoticiaCla.com cu un situacion in usual a surgi siman pasa pa dos dia unda cu no por a registra nummerplaat nobo pa automobilistanan. Ta trata di personanan cu sea a cumpra auto nobo y cu no tin plachi ainda of simplemente kier a cumpra un number extra. E situacion mientrastanto a keda atendi unda cu mientras cu awor por registra number, e automobilista ‘ainda’ no por ricibi esaki si.

SITUACION DIAHUEBS

Tabata diahuebs siman pasa cu clientenan nobo a bin pidi number nobo pa e motibonan conoci caba. “Dado momento nos reserva a caba. Nos tabata bezig caba cu e tramite pa extra bestelling pa number, pero e momento ey e tramitenan ey no tabata cla ainda” Romano a sigui bisa. Como tal no por a duna e clientenan e momento ey, un number. Esey a sosode riba diahuebs y diabierna.

BESTELLING PA NUMBER

Mientrastanto a haci e bestelling y entrante dialuna mainta DIMP a cuminsa yama e clientenan pa nan bin bek pa por a registra nan y duna nan un carta cu ta autorisa nan pa nan mes traha un plachi temporal (valido pa 30 dia), te ora cu e plachi di number mes yega Aruba. E ora lo yama e cliente pa e bin busca e plachi. E ta un situacion in usual, unda cu tin un demanda asina grandi pa number di auto, cu a pone cu numbernan di reserva, y numbernan no busca di e aña anterior a wordo bendi. Ta trata di un cantidad di entre 1000 pa 3000 number extra cu a wordo bendi cu a pone cu DIMP a hay'e den un situacion asina. Mientrastanto a bestel 600 number extra cu ta yega Aruba proximamente. E number exacto di cliente cu awor a keda sin number, no tabata conoci ainda pa Romano. “Pero e demanda pa plachi di number nobo t'ey tur dia” Romano a sigui bisa.