Polis a lanta team special pa traha riba caso atraco casino

ORANJESTAD – Mando policial a lanta un ‘Team Grootschalig Onderzoek’ cu lo traha riba e caso di atraco grandi cu a sosode awe mainta na Excelsior Casino na Holiday Inn. Vocero di polis Liliana Rasmijn a confirma na NoticiaCla.com awe nochi cu e team aki ta consisti di diferente departamento di recherche di cuerpo policial, hunto cu Ministerio Publico. Hunto nan lo traha pa resolve e asunto aki.

FRONTERA CERA

Riba e asunto di frontera cera, Rasmijn a splica cu esaki ta nifica cu ‘control a wordo intensifica’. Esaki ta nifica estrictamente cu ta trata di controlnan na frontera, esta laman y tera. “Dus ta controla mas bien esnan cu ta sali”, Rasmijn a clarifica. No ta asina cu ta stroba botonan y avionnan pa sali, sino mas bien ta haci e control di pasahero bandonando Aruba, mas estricto. E team aki Lo ta hasiendo diferente controlnan y investigacionnan den diferente districtonan y lo intensifica e controlnan na waf, na aeropuerto y costanan. Tambe lo controla autonan y otro vehiculonan mas intenso cu normal.Polis ta pidi publico pa tene cuenta cu e sircumstancianan y pa carga un poco pacenshi mientras esakinan ta tuma lugar.

NACIONALIDAD DI ATRACADORNAN

Informacionnan inicial cu ta bisa cu ta trata di 2 Venezolano y un Arubiano, no por a wordo confirma pa Rasmijn. “Nos no por bisa nada ainda di e nacionalidad. Solamente cu nan ta ‘spaans sprekende. Tur tres".Tampoco por a bisa mucho mas riba e suma di placa cu a logra bay cu ne. Solamente cu ta un suma considerable. "Corda cu e investigacion ta andando ainda” Rasmijn a sigui bisa, indicando cu no ta bay duna cifra pa awor. Ta conoci cu ta tactica pa no duna cifra pa no yuda e atracadornan den e caso aki.

AUTO HAYA

Manera ta conoci, a haya un auto tambe di huur na Rooi Santo, cu polis a confisca tambe. Riba esey tampoco por a bisa mucho awe nochi, sino solamente cu e ta wordo investiga tambe.

INFORMACION

Hopi pues mas no por a saca afor, sino solamente cu ta trahando duro riba e caso. A pidi pa si tin hende cu tin informacion di e caso, pa por fabor tuma contacto cu polis via e tiplijn 11141 of 100.