Koenders: Vigilando migracion Venezolano pa parti Caribense di Reino

DEN HAAG – Enberdad e cantidad di Venezolano cu ta biaha pa Corsou y/of ta keda mas largo cu ta permiti, a aumenta. Pero no substancialmente. Asina Minister di relacionnan exterior Bert Koenders ta contesta Parlamentarionam Hulandes Ten Broeke y Bosman awe den un carta riba un serie di pregunta rond di e situacion di Venezolanonan den Caribe Hulandes. “Desde augustus no a bin cambio, of poco cambio den esaki” Koenders ta sigui bisa. Segun e mandatario, autoridad di Corsou ta ‘monitor e cantidad di persona cu ta viola nan termino di estadia’. Pero cifranan oficial, autoridadnan no ta publica. Y segun e mandatario Hulandes, e situacion segun autoridad di e isla, ta ‘manehable’.  

PATRONCHI NO A CAMBIA

De hecho Corsou no ta spera cambio grandi den futuro riba e patronchi ey, pero ‘ta prepara riba cualkier eventualidad’. “Gobierno (di Hulanda) tin contacto estrecho cu autoridad di Corsou riba e desaroyo na Venezuela y migracion di Venezolano pa e parti caribense di Reino”. Tambe autoridad di Corsou ta tene bista hopi cerca riba desaroyo na Venezuela, y e posibel consecuencia pa e isla. A mustra e parlamentarionan Hulandes riba e autonomia riba e tereno aki, y cu nan a tuma cierto medida pa frena e migracion ilegal. “Entrada ta un autoridad di Corsou. Como tal ta keda na Corsou pa instala e proceso rondo di entrada y salida. Corsou ta hopi alerta riba e migracion(ilegal), tambe for di Venezuela”. Banda di esey, a splica cu e servicio di imigracion di Corsou, ta tene su mes ocupa cu persecucion di personanan ilegal riba e isla. Esey ta conduci tambe constantemente na deportacion di hendenan ilegal di e isla, tambe pa Venezuela.

FENOMENO NO TA NOBO

A splica tambe cu e hecho cu algun persona ta yega Corsou legal, y despues ta keda mas largo cu ta permiti, no ta un fenomeno nobo. “No ta posibel pa saca afo solamente a base di e informacion di yegada y e duracion di e estadia, pa determina si un persona ta kedando ilegal na Corsou of no”. Esaki pasobra, manera Koenders ta sigui splica, un persona por cambia su titulo di estadia durante su estadia, pasobra e.o. e ta dicidi di extende su visa di estadia of pidi un permiso di trabou. E ora no por papia di un estadia ilegal. A sigui na splica cu Venezolanonan no mester di visa pa drenta e islanan caribense di Reino. Y ta sigui splica e proceso completo.

TASK FORCE

A haci mencion tambe cu Corsou tin un taskforce cu e meta pa, hunto cu tur partidonan relevante, monitor e desaroyo na Venezuela y e posibel influencia riba esaki. Defensa y kustwacht tambe ta forma parti di e grupo aki segun e mandatario. Y finalmente, Koenders ta sigura cu Corsou tin suficiente capacidad pa ricibi e migrantenan y of detene nan, den preparacion pa nan posibel deportacion. Lesa e preguntanan completo aki.