A cera frontera di Aruba pa evita cu atracadornan por hui

ORANJESTAD - Autoridad local a cera frontera di Aruba, pa evita cu tres atracadornan por hui. Vocero di polis Liliana Rasmijn a confirma awe mainta na NoticiaCla.com cu tanto na waf di Barcadera, playa y Aeropuerto a alerta autoridad cu ta pone cu ningun hende ta sali pa awor. Mas informacion ta saliendo tambe riba e caso di e atraco mes awe mainta na Excelsior Casino na  Holiday Inn hotel. E melding mes a drenta pa 8:15 am awe mainta, mientras cu e atraco mes a tuma lugar 6:50 am. Ta trata di tres homber di habla spaño, fuertemente arma cu a drenta e casino awe mainta trempan. Nan a haya 4 trahado den e casino, cu a wordo mara cu "tie wrap" un banda. Algun di e trahadonan a wordo agredi cu e cabo di e arma cu nan tabatin, segun Rasmijn. 

AUTO HORTA

Mes momento autoridad a haya un melding di un auto di huur na Rooi Santo den un hanchi, aunke no por sigura cu ta trata di e vehiculo usa pa e atraco. Polis a pidi pa takel esaki y investiga e caso pa wak si ta trata di e vehiculo di e atraco. Tambe Rasmijn a confirma cu e botin ta un 'hopi hopi grandi'. Polis ta trahando riba algun bon pista, y ta spera cu pronto por pone man riba e atracadornan aki.