Alumnonan di Internacional school a traha man 3D pa alumno cu falta man

ORANJESTAD – Siman pasa un grupo di alumno di international school cu nan docente di technica, Pieter Verduin, a traha y entrega dos man special pa e alumno “Zizi” cu a perde un di su mannan durante un accidente di vuurwerk. Verduin a splica NoticiaCla.com cu nan a reacciona riba un peticion di juffrouw Andrea van Hoof, cu tabata pidi pa un ‘3D- printer’. “Mi a reacciona pasobra nos scol tin uno (printer)” Verduin a bisa NoticiaCla.com.

PROCESO PA TRAHA E MAN

Segun Verduin, nan a crea e man via e printer, y a sigui e principionan di www.enablingthefuture.org. E mannan aki ta hopi barata pa traha (50USD) y nos ta traha nan pornada. Pa por a traha esaki, nan mester a check e midinan exacto y traha te ora cu nan haya esun corecto. “Te awor, nos no a haya mas peticion (fuera di Zizi) pa traha mas. Pero esun cu pidi, lo nos traha p'e" e docente a sigui splica NoticiaCla.com. E scol y e maestro a usa e proyecto di Aruba Bank, esta Good4theneighbourhood pa duna e proyecto aki mas y mas atencion, manera cu e merece.