No sa ainda si ta denuncia docter di eerste hulp pa fraude

ORANJESTAD — E seguro medico general AZV a confirma cu un docter di eerste hulp di centro medico IMSAN na San Nicolas a comete fraude, door di traha receta y test di laboratorio riba gasto di AZV, pa su clientenan di su practica priva. Asina e partner di NoticiaCla.com, Caribisch Netwerk ta raporta.  E funcionario di AZV, Joost van de Kamp, no por bisa ainda si AZV lo denuncia e docter di eerste hulp, cu mientrastanto a tuma su retiro (di IMSAN).

TIPS

"Ta berdad cu nos a haya tips di un docter cu tabata traha na IMSAN, y tabatin un practica priva na banda” van de Kamp a bisa. “Esey explicitamente no ta para den su contracto di trabou cu IMSAN. Nos a mira si enberdad esey ta asina y a yega na e conclusion cu e homber enberdad a skirbi receta y tambe a haci trabou di laboratorio. Nos a informa IMSAN di esaki” . No a haci un denuncia ainda na Ministerio Publico ainda. “Ta haciendo mas investigacion” van de Kamp a sigui bisa. Cuanto placa e receta y cuanto e trabou di laboratorio a costa AZV, no ta conoci ainda, segun van de Kamp. E indicacion ta cu e gastonan por ta den miyones. Pero van de Kamp ta desmenti e suma particular ey. “Pero cada florin cu no ta bon gasta, ta un problema”. Siman pasa e directiva y hunta di comisario di AZV a reuni cu otro, riba entre otro e posibel denuncia contra e docter di eerste hulp.

SALON DI BEYESA

Pashentnan cu tabata dispuesto pa paga pa e servicio, tabata wordo trata den un salon di beyesa na cas di e docter en cuestion. Eynan nan tabata haya receta y test di laboratorio, riba gasto di AZV. Tumamento di sanger tabata tuma lugar den e salon di beyesa, enbes di un laboratorio. E documentonan di IMSAN tabata wordo treci pa landslaboratorio cu un peticion di urgencia, cu ta pone cu e clientenan di e docter en cuestion, por a ricibi nan resultado di laboratorio e siguiente dia caba.

DOCTER GARA

A gara e docter finalmente ora cu a resulta cu e tabata skirbi hopi receta y tabata busca e remedinan cada bes na e mesun botica cu e carnet di su clientenan. IMSAN a adverti e docter caba pa su practica di trabou ‘na banda’, pero no pa e uso di servicio y material di AZV, pa su propio practica. E docter, -pasobra e no ta registra na Hulanda-, tabatin permiso solamente pa traha como docter di eerste hulp na IMSAN.

RETIRO

Despues cu AZV a haci e investigacion, e docter a wordo atendi riba su caso. E mes a entega su retiro na IMSAN, y a move mesora tambe. IMSAN despues no a tuma mas paso contra e medico, pasobra e fraude no a tuma lugar riba gasto di IMSAN, sino di AZV. Loke si e centro medico a puntra AZV, ta cu si nan lo haci denuncia na Ministerio Publico contra e ex medico di IMSAN.

Di Caribish Netwerk. Autor: Ariën Rasmijn. Foto: Ariën Rasmijn