UA: Mayoria hoben na Aruba adicto na social media

ORANJESTAD - Mayoria hoben na Aruba ta adicto na social media. Por lo menos segun un encuesta unda cu 85% di hobenan entrevista den e encuesta hasi pa Universidad di Aruba. Aki nan a bisa cu nan ta considera nan mes adicto na Facebook, whatsapps, Internet, twitter, instagram y otro medionan social. Un hoben di Aruba tin un average di 8 ora pa dia conecta cu medionan social.

IMPORTANCIA DI E DATO

Minister Paul Croes, cu tin e cartera di hubentud, a mustra e importancia di e datonan aki, como cu esaki ta trece oportunidadnan, pero tambe su reto. " Awor nos sa atleast unda nos por haya e hobenan. E plataforma electronico, e cyber area aki ta na unda bo por intercambia ideanan, programanan, campaña y informacion cu nos hobenan. Nos hobenan ta hopi mas "connected" cu generacionan anterior", Croes a mustra. E estudio hasi pa universidad di Aruba bou di guia di Profesor Ryan Peterson a wordo hasi a peticion di Croes pa asina acomula datonan riba norma y balornan di nos hobenan. Hobenan ta duna hopi importancia na nan propio felicidad y alegria. E hecho cu mas di 85% di nos hobenan ta admiti di ta adicto na medionan social sigur ta un dato importante.

POSITIVO Y NEGATIVO

E informacion aki sigur pa instancianan social y hudicial mester ta un "eye-opener", como cu e presencia di nos hobenan den e espacio cybernetico aki ta trece peliger tambe cu ne. E cantidad di informacion, y mas cu tur e acceso cu nan tin riba tur clase di informacion ta trece retonan grandi cu ne. Minister Paul Croes a bisa di lo organisa tambe un session informativo cu varios stakeholders pa discuti e aspecto specifico aki entre nan. "Nos como gobierno, pero tambe mayornan mester ta consciente di e comportacion digital aki. Nos tin cu sigui garantisa e proteccion y formacion di nos hobenan y muchanan pa cumpli cu nan derechonan como ser humano", Croes a finalisa bisando.