Mike Eman: Salario di minister Bermudez ta igual na tur otro minister

ORANJESTAD – “E salario di minister Bermudez no ta bay ta otro cu e salario di e otro colega ministernan”. Cu e declaracion ey premier Mike Eman a contesta NoticiaCla riba e posibel precupacion cu tin den comunidad cu e mandatario nobo lo ta ganando un cantidad enorme di placa. Segun e prome mandatario, a invita sr Bermudez pa tuma e encargo di minister, y ‘e la tuma cu e lusten y e lasten”. Segun Eman, e lasten den e caso aki ta cu e ta un salario cu ta menos cu hopi bes un profesional (manera Bermudez) por haya pafo. “Pero e ta un persona cu ta dispuesto pa haci e sacrificio y dedicacion pa nos pais, pa cual nos ta gradici e tambe” Eman a sigui bisa.

E pregunta riba e cantidad di ministers tambe a bin dilanti pa NoticiaCla. Aki tambe tabatin precupacion di pakico no a probecha awor cu baymento di ex minister Juan David Yrausquin, pa reduci e cantidad di minister bek na 7 y reduci asina e gastonan necesario. Pero un biaha mas Eman, a mustra cu ora cu a inicia e gabinete Mike Eman II, a mira cu e trabaonan cu 7 ministernan mester a haci den e prome gabinete, tabata mucho hopi riba algun area. A bin asina riba e reparticion cu cierto carteranan por a haya e atencion completo pa nan haya. Pa loke ta e gastonan, a logra (segun Eman) baha gasto cu ta pone cu 9 minister no ta costa mas cu 7 minister den e ministerionan. A sigura cu aki tambe a reduci e cantidad di staf di minister pa evita cu e ta bay pisa mas riba e presupuesto cu ora cu bo tin 7.

Pa loke ta e contracto supuesto lucrativo di sr Bermudez, NoticiaCla a compronde cu lo tin un contracto cu ta circulando, cu lo ta mustrando cifra di por lo menos 19 mil florin pa luna. Esey a crea precupacion ora cu a tende cu awor e mesun persona aki lo mester a bira minister, y cu posiblemente e mesun salario aki. NoticiaCla no a pone man riba e documento aki pues no por confirma e cifra aki.