Awacero fuerte cu hagel a sorprende hopi na Aruba diadomingo

ORANJESTAD – Aunke cu a pronostica mal tempo pa diadomingo cu chens pa strena cu lamper, toch ela sorprende hopi hende diadomingo atardi. Sigur ora cu hagel a cay aserca. Un area di awacero local cu a forma hopi liher banda y riba Aruba, a causa basta problema pa cierto parti di nos isla. Oficialmente a midi cantidadnan manera 61mm di awacero (Hadicurari), mientras cu otro areanan a haya menos y otronan mas. Loke a hala hopi atencion ta cu na Noord, unda cu el a yobe mas duro, te hasta hagel a cay. Un splicacion di servicio meteorologico ta cu e hagel cu normalmente por cay, lo tabata hopi grandi mes, y dor di movecion vertical fuerte, y maske e hagel a dirti, tog un pida ijs isola (hagel) hopi chikito a yega superficie. Dentro di rato, varios potret a cuminsa circula riba Facebook cu e hagel aki. Sinembargo oficialmente Meteo no kier a confirma esaki. Algun ciudadano cu cual NoticiaCla.com a papia cu ne sinembargo, a confirma e fenomeno aki y a comparti e potretnan. Varios area a keda inunda atrobe, cu e problemanan usual, manera cierto potretnan ta indica. Tambe coriente a bay na varios caminda ora cu lamper a dal. Tin areanan cu pa 7:15 pm ainda no a haya coriente bek. Areanan manera Noord, Alto Vista y Ponton ainda tabata pendiente di coriente, cu a bay for di 3:30 pm di atardi. 

ALERTANAN A CUMINSA

Tabata diadomingo atardi den careda di 3:20 pm, Meteo a cuminsa emiti boletinnan special, alertando di tormenta activo riba porcionnan west di Aruba, y cu esaki lo a mengua pa 4:30 pm. Segun Meteo, e area di awacero a desaroya hopi lihe y e topnan di nubia tabata halto y relativamente severo. Meteo a wordo notifica cu, diferente persona a observa algun hagel chikito den e area di Noord. Door cu personal di Meteo mes no por a verifica e observacion, y ta dificil pa verifica autencidadnan di e potretnan e ta keda un observacion no oficial.

SISTEMA MODERNO 2016

A mustra cu a 2016 Aruba lo tin sistema di observacion pa aeropuerto hopi moderno cu su propio radar y asina nos por analisa e fenomenonan aki mas mihor. Maske cu cambio climatico por crea tempo no usual, no por culpa cambio climatico pa 1 fenomeno individual, manera esun di awe.

CANTIDAD DI AWA CU A CAY

Na Hadicurari Meteo a midi 61 mm di awa. Na Meteo no a midi awacero, dor cu lamper a causa un fayo den e equipo di Meteo na Airport. Personal di Meteo a drecha e equipo mientrastanto. Ariba e foto di radar por wak ora e tempo tabata basta activo.

PROXIMO ORANAN

Pa e proximo 24 ora ainda un disturbio den nivelnan mas halto di atmosfera ta mantene e aire instabil, y e chens pa un yobida isola compaña cu lamper y strena ta keda posibel. Meteo ta recomenda personanan cu observa hagel otro biaha, pa saca un potret y pone e posibel hagel den freezer te ora personal di Meteo por observ'e di mas acerca.NOTA: Foto di portada ta cortesia di Derk Jan Nauta, di Hagel ta di Yolanda Hagelen, y for di laman, di Joana Alvarez.