Aruparking : Mas clarificacion riba klem y su destruccionnan

ORANJESTAD - Aruparking mester a bolbe clarifica algun informacionnan eroneo di e klemnan cu a keda publica. “Nos kier a splica un biaha mas cu e compra di e klemnan a bay via All-In-Energy cu ta representa Mackay na Aruba. Aruparking a ricibi un quotation pa tur cos cu ta regarda na e operacion di Aruparking. E compania Mackay a ofrece Aruparking e facilidad di otro producto y componente nan for di un tercer compania. E compania en cuestion ta uno renombra y sigur lo no bay ofrece productonan inferior pa atacha nan nomber” e comunicado di e compania ta cuminsa na bisa.

DAÑO DI KLEM

Referiendo na e klemnan cu a wordo kibra, nan kier reitera cu e daño no tabata humano sino di un auto cual tin hopi peso y sigur si uza esaki como medio pa comete destruccion, ta hopi daño e por ocasiona. Un klem no por resisti e forsa di un auto na momento cu un persona keda bay dilanti y patras pa varios minuut, cu e unico meta pa destrui esaki. Esaki ta algo condenabel cu ta sigura di haci daño na un klem den e forma aki. Mester corda si, cu e acto aki lo ocasiona daño na e propio auto mes tambe mirando cu e klem ta di hero.

PERSONA MALCONTENTO

A surgi un situacion diaranson tambe caminda un persona a kibra un klem pa motibo di no tabata di acuerdo cu maneho di e parkeerwachter, mirando cu nan a para riba nan tereno y asina mes nan vehiculo a wordo geklem. Aruparking kier a aclaria cu bou di ningun circunstancia ta permiti pa para riba acera mas. Den caso specifico aki a actua mirando cu e auto tabata para riba acera e vehiculo a wordo geklem. Mas leu ainda por menciona cu tereno priva ta cuminsa despues cu pasa e acera y riba acera no ta permiti pa staciona ningun tipo di vehiculo.

MAL STACIONAMENTO

Un otro fenomeno cu nos a constata ta e mal stacionamento den e parkeervakken nan. Ora di staciona den un di nos parkeer vak nan mester semper corda cu no ta permiti pa para riba un di e linea nan y mester para bon, mei mei di e liñanan pa no stroba un otro persona di uza e espacio banda di bo. E mal stacionamento lo tin como consecuencia cu bo auto por wordo geklem, segun ley cual ta e Landsverordering Parkeerzones den artikel 10 eerste lid onderdeel A. Lo tin gastonan envolvi pa kita esaki manera tur hende ta na altura di dje. Aruparking ta spera cu e clarificacion nan aki trece un poco mas claridad pa asina tur hende ta na altura y bon informa. Pa mas informacion por pasa libremente na Aruparking den Wilhelminastraat.