Frasa : Semper a respeta ley laboral y ta yama sindicato bon bini

ORANJESTAD - Despues di a tuma nota di articulo publica den prensa local, Frasa International Trading na nomber di su director Francis Saladin, a lamenta cu, -di un forma innecesario-, a crea un impresion robes den publico. Gerencia ta opta pa no bay den detayenan di e caso, ya cu ta un principio di nos empresa pa no atende asuntonan personal di empleadonan den luz publico como respet pa su privacidad.

DECLARACION DI STA

E articulo en cuestion ta basa riba declaracion haci pa representante di sindicato STA cu kende Frasa International Trading ya tin algun tempo den dialogo. E esfuersonan ey a keda abruptamente interumpi pa e intento di difamacion publico di e siman aki. Gerencia di e compania ta di opinion cu lo tabata na su luga pa e sindicato a tuma contacto cu nos pa asina haya informacion di ambos banda prome cu bay na prensa.

Mas aleu, portanan di e empresa local, cu varios decada di trayectoria respetabel den comunidad, semper tabata y ta keda habri pa cualkier instancia pa verifica cu ta cumpli cu tur regla y norma stipula den ley.

REUNION CU STA

Diahuebs mainta gerencia a sinta na mesa cu sindicato STA y Mediador pa asina yega na palabracionnan concreto cu ta regarda e continuacion di e relacion. Conclusion di e reunion aki ta cu e sucedido no ta cambia e obhetivonan fiha y ta bay awo na surpasa e supuesto impasse aki pa sigui traha na bienestar di e trahadonan.

FRANCIS SALADIN

Managing Director, Sr. Francis Saladin a indica cu “Frasa International Trading ta aplaudi entrada di sindicato paso esaki ta facilita e relacion laboral cu e trahadonan, na beneficio di nan mes y tambe di e compania.”