Lo trata situacion turistanan Venezolano den conseho di minister awe

ORANJESTAD - Durante reunion di conseho di minister awe, gobierno lo trata e situacion di turistanan Venezolano y kico cada ministerio lo haci al respecto. E situacion di turistanan Venezolano "tin atencion di gobierno riba tur e nivelnan cu ta atendiendo cu esaki, y nos a informa tur e gremionan cu tabata den e reunion cu nos, pa nan por tin un idea cu e preocupacionnan cu ta biba, naturalmente ta biba cerca Gobierno tambe y ta ricibiendo e atencion”. Esaki tabata e mensahe principal cu gobierno a manda pa tur stakeholder den un reunion diahuebs atardi.

COMUNICADO DI ATIA

Mirando cu ATIA a saca un comunicado riba un topico cu tanto Gobierno como tur e diferente partnernan den turismo, ta trahando riba dje e ultimo tempo aki, a mira e necesidad pa sinta hunto pa intercambia informacion. Entidadnan manera Aruba Hotel And Tourism Association (AHATA), Aruba Tourism Association (ATA), Aruba Timeshare Association( ATSA), Aruba Airport Authority(AAA), SIAD, DTP, ATIA, Camara di Comercio y Aruba Bankers Association tabata presente durante e reunion aki.

DIVISION ENTRE E MERCADO

ATA a duna un presentacion riba kico e division entre e mercado Venezolano ta. Ta importante pa mantene e mercado aki mirando cu nan ta e di dos mercado turistico principal pa Aruba. Ta netamente e grupo aki ta esun cu ta contribui mas tanto na nos economia na momento cu nan ta bishita nos. Pero e efectonan di ultimo tendencia awor mirando e situacion politico na Venezuela, ta pone cu tin un grupo cu ta bini Aruba y purba bay bek cu mas tanto dollar posibel.

KICO GOBIERNO TA HACIENDO SPECIFICAMENTE

Minister Oduber a splica cu su colega Minister Bermudez conhuntamente cu SIAD y tambe ATA ta registrando y bishitando tur e adresnan cu na e momentonan aki e hendenan ta kedando na dje, pa e personanan aki tambe contribui y cumpli cu nan deber di impuesto cu ta bin cu e negoshi aki. Durante e reunion SIAD a duna un indicacion cu esaki ta andando, y a ricibi hopi reaccion di hendenan cu a cuminsa regla nan negoshi mientras otronan a ricibi cobransa. Tabata tin un comision encabesa pa ATA conhuntamente cu Brandweer, Departamento di Salubridad y Cuerpo Policial cual a bishita mas di 100 adres, y lo continua pa bishita mas, pa mira cu e calidad cu e adresnan aki ta ofrece ta uno cu lo por continua cu e negoshi of cu lo mester para e actividadnan aki.

NO MESTER GENERALISA SI

E mandatario di turismo a bisa si cu "Mester percura si pa no generalisa un mercado asina importante pa nos. Nos mester tin e medidanan cu nos ta tuma na nan luga pa atende cu e fenomeno cu nos no kier mira crece”. Aki e ta referi na medidanan cu lo keda trata durante reunion di Conseho di Minister diabierna y lo keda anuncia pa cada Minister na su debido momento.

GREMIONAN SATISFECHO

Tanto ATIA como Camara di Comercio a sali satisfecho cu e informacion ricibi mirando cu hopi ta e accionnan tumando luga y ta spera cu lo continua riba e bon caminda aki. “Ta berdad. Nos a sali satisfecho” presidente di ATIA, Michele Henriquez a bisa NoticiaCla.com. “Nan (gobierno) ta trahando riba dje, pero nan tin hopi reto”. Ta importante pa nan ta na altura y tin e informacion adecuado pa nan por traspasa esaki pa nan miembronan. Despues di e reunion awor ambos tin un miho bista di e maneho cu ta hibando pa frena un fenomeno creciente riba nos isla.

REACCION ODUBER

Segun e mandatario di turismo" E preocupacion ta cerca tur hende pa algo cu nos no ta custuma cu ne, cual ta un turista cu ta bin bishita nos pa hiba e dollar bek pa e por economicamente y socialmente e por tin un miho biba na su pais. Nos mester percura pa cuida nos frontera y naturalmente e imagen di pais Aruba turisticamente."