Horcan mas grandi di mundo Patricia yegando Mexico

MEXICOCITY – E horcan pacifico Patricia a bira e horcan mas fuerte registra na mundo. Esey a keda confirma awe mainta pa National Huricane Center na Miami. Mes momento nan tabata raporta cu e horcan tabata na caminda pa un yegada cu consecuencia ‘catastrofico’ ora cu e subi tera na Mexico mas laat awe. E biento mas fuerte registra ta di 325 km pa ora, cu ta cualifica como horcan categoria 5. 

OTRO HORCANAN

Tin informacion cu toch tabatin horcannan mas grandi, manera Violet na 1961 cu a yega 330 km pa ora y Nancy cu ayega 345 km pa ora. Autoridad Mexicano a anuncia un medida di emergencia caba for di diahuebs. Ta premira cu mas laat awe of diasabra marduga, e por subi costa west di e pais. E costa di provincianan Guerrero, Michoacán, Colima y Jalisco mester tene cuenta cu horcan aki. Ultimo biaha cu Mexico a keda afecta pa un horcan tabata na 2002, ora cu e horcan tropical Kenna a subi tera cu velocidad di 225 km pa ora.