Gobernador St Maarten ta nombra formado awo, eleccion otro aña

PHILIPSBURG –Gobernador Eugene Holiday a nombra lider di fraccion di National Alliance, esta William Marlin como formado, cu e tarea pa forma un gobierno nobo basa riba un mayoria minimo di 8 (di 15) asiento den parlamento.

ALEGRIA LIMITA

E alegria den e campo di e mayoria minimo ta limita, pasobra gobernador a indica indirectamente cu e lo firma e landsbesluit cu tin cu desolve e parlamento asina cu e miembronan di e gabinete Gumbs retira. Esey ta nifica cu St Maarten lo probablemente bay eleccion atrobe otro aña, posiblemente den februari.

PRIORIDAD

Gobernador a duna Marlin te dia 20 di november pa completa su tarea di formacion. E prioridadnan pa loke mester bira un gabinete interino, ta e cambionan di presupuesto 2015, e preparacion di presupuesto 2016 y e preparacion di e eleccion nobo.

GABINETE GUMBS

Gabinete Gumbs mientrastanto ta nenga di baha. Pero gobernador a parse di a haya un solucion pa e impasse aki, door di laga Marlin forma un gobierno nobo. Segun e conseho huridico di tres hues, esta huesnan Evert-Jan van der Poel, Bob Wit y Jan de Boer, e proceso di formacion di gobierno por continua sin problema, cu e retiro di e gabinete actual.

ELECCION

Asina cu e retironan aki ta un hecho, gobernador por firma e desolvimento di e parlamento. For di e momento ey, mester tin eleccion pa asina e parlamento nobo por wordo huramenta dentro di 3 luna.

Pa Caribisch Netwerk. Autor: Hilbert Haar   Foto: Hilbert Haar