Cruise Symposium 2015 a inicia awe mainta

ORANJESTAD – E Cruise Symposium Aruba 2015 a inicia awe mainta. Como orador principal tabatin e presidente di Asociacion di Relacionnan Gubernamental Latino Americano y Caribe pa Royal Caribbean Cruises Ltd., Sr. Federico González-Denton. Esaki ta despues cu aña pasa oficina di turismo pa prome biaha a organisa e Simposio Crucero aki, cu a resulta di ta un exito.

OPORTUNIDAD

E ta un oportunidad pa tur e stakeholders y partnernan por haya un miho bista di e desaroyonan. Minister Oduber a comenta cu lo comparti informacion di cantidad di barconan, e cantidad di pasahero cu ta bay crece y tambe e posibilidadnan cu tin pa tur esunnan cu ta traha den e industria aki y kico esaki lo nifica pa economia di Aruba. E meta di e Cruise Symposium Aruba 2015 ta pa crea negoshinan dentro di e industria aki cu ta riba un caminda asina positivo y creciendo.

INICIO TEMPORADA HALTO

Cruise Symposium Aruba 2015 ta duna tambe e inicio na e temporada halto di turismo crucero cual ta core te cu mei 2016. Aunke mester bisa si cu desde 2013 e maneho ta dirigi cu Aruba no conoce "off season" mas. Na 2013 turismo crucero a conoce un 100 mil pasahero adicional pa e barconan crucero, netamente den e temporada di mei pa october, cu ta conoci pa ricibi un cantidad minimo di barco crucero.