Angel Bermudez: “Mi no ta un loose cannon”

ORANJESTAD – “Mi no ta un loose cannon” ta e forma con minister nobo di Finanza Angel Bermudez a cataloga su mes na NoticiaCla, riba e pregunta si e por haci kico cu ta pasobra e no ta un minister politico. Un di e hopi preguntanan den su direccion, ora cu e la wordo oficialmente presenta dialuna atardi na prensa. Prome cu esey, e la huramenta dilanti gobernador interino Ella Tromp, den compania di su colega ministernan. E ta reemplaza su previo ‘hefe’ Juan David Yrausquin, cu a entrega su retiro den un forma sorpresivo, casi un luna pasa. Bermudez lo tin cu termina e trabou cu Yrausquin a cuminsa 9 luna pasa, y segun su hefe nobo, premier Mike Eman, e ta e persona mas indica pa e trabou, ‘mirando su curriculum vitae extenso’.

Bermudez ta considera e puesto como uno hopi pisa, den e temporada aki, pasobra e circumstancianan ta hopi complica. Mesun momento e la sigura NoticiaCla cu e la haya bendicion di su famia prome cu e la acepta e funcion aki algun dia pasa. E ta conciente di e disputa constitucional cu tin den Reino aworaki riba nos autoridad riba derecho presupuestario. “Esey mi ta lague pa e politiconan y academiconan” Bermudez a core bisa. Y e la sigui pa describi e plachi financiero internacional, mustrando cu cosnan ta hopi dificil tur caminda, relativando asina e situacion na Aruba.

E la sigura tambe cu e lo continua e maneho rigido pa controla tur hende y sigura cu nan ta ‘keda den nan begroting”. Mes momento e la sigura cu lo tin cu sigui reduci unda cu por y pa tin e gastonan bou di control. Mester produci cifranan cu ta realistico, modernisa nos sistema di impuesto, y leynan mester wordo simplifica cu un base mas amplio. Loke tambe Bermudez kier logra ta pa optimalisa e entradanan na departamento di impuesto, pa no lubida, haci e servicio di gobierno mas eficiente. Basicamente, e loke cu su predecesor a lucha pe pero no a logra termina.

Riba e asunto di CFT, e mandatario recien huramenta no kier a bisa mucho, sino solamente cu e ta en espera di e recomendacionnan cu lo tin cu bin, y cu e ta kere cu mester bin medidanan husto. Y aki Bermudez a sugeri den direccion cu esnan cu ta gana mas, posiblemente lo tin cu paga mas, y esnan cu ta gana menos, paga menos. E la uza e expresion “Esnan cu tin lomba hancho, tin cu bay carga mas y esnan cu tin lomba chikito of smal”. E no ta un reto facil ni lihe pero cu lo tuma algun aña. E la pidi ‘papadios’ pa pasenshi, huicio y tempo y espacio, pero sigur salud pa e por haci su trabou. Riba e presupuesto 2015, ta trahando segun Bermudez, y si intento ta pa e yega na ora. “Nos tin cu duna e ehempel” Bermudez a bisa, y e ta spera cu nan ta yega e fecha na tempo.