Ling & Sons a regula benta di cerbes na cierto grupo Latino

ORANJESTAD – E asunto di benta excesivo di cerbes tin atencion di gerencia di e supermercado Ling & Sons. Director Richard Eman a confirma na NoticiaCla.com cu pasonan a wordo tuma pa restringi e benta y pa evita cu cos por ‘sali for di man’, particularmente cu e benta excesivo aki. Eman ta referi na Venezolanonan cu ultimo tempo ta purba cumpra cantidadnan excesivo di caha, cu fin pa rebende esaki cu otro hendenan despues.

LIMITA CANTIDAD DI CAHA

Segun Eman, ora cu nan a tuma nota di e fenomeno na cuminsamento, nan a tuma paso mesora, di entre otro limita benta di caha di cerbes na solamente 5 pa persona. Ademas a prohibi pa rebenta ‘ilegal’ tuma lugar despues riba nan tereno pafo. Na inicio, Eman ta confirma cu mester a involucra polis pa atende cu e situacion ora cu e grupo tabata haci esaki. Esey no ta sosodiendo mas awor segun Eman.

DIFICIL PA CONTROLA

A mustra mesora cu mientras cu ta trata di gruponan di Venezolano, no por stop benta y ta dificil pa controla e situacion den cierto forma. E benta riba su mes, no ta produci gran ganashi pa e compania, compara cu otro tipo di producto cu si ta genera ganashi. Y segun Eman ta notabel cu e personanan aki ta bin solamente pa cumpra e cerbes y nada mas. Nan tabata bay pafo, habri bahul y cuminsa bende. Algo cu obviamente no ta permiti, por lo menos no riba tereno di Ling & Sons.

MEDIDA INDIVIDUAL

Eman a splica cu no ta conoci si otro supermercadonan tambe a tuma mesun paso di e.o. limita benta di cerbes na e grupo di persona aki. A splica tambe cu no tin un tipo di ‘asociacion’ di supermercado unda cu nan tin contacto cu otro pa sa kico ta kico. Como tal riba e asunto aki, tampoco nan no sa kico otro supermercadonan a haci y ta haciendo pa ‘combati’ e fenomeno aki.