Pagina riba www.ea.aw dedica na studia na Merca y Canada

ORANJESTAD - Recientemente a tuma luga un anochi di informacion pa tur mayor y studiante dedica na e topico studia na Merca y Canada. E anochi aki a conta cu un publico hopi grandi cu a confirma e necesidad y interes pa e opcion di studia na Merca y Canada. E anochi tabata un hopi informativo unda cu diferente instancia a duna informacion, entre nan Ministerio di Enseñansa, Departamento di Enseñansa y tambe Aruba Scholarship Foundation. Durante di e anochi tambe a skype cu dos studiante cu actualmente ta den exterior, un studiante na Gainesville Florida y e otro studiante na Toronto Canada cu a comparti nan experencia y algun tips cu e publico. Esaki sigur tabata un aspecto hopi special y interactivo y cu a wordo aprecia door di e publico presente.

PAGINA SPECIAL

Durante di e anochi di informacion tambe a wordo presenta e pagina special riba e website di Enseñansa di Aruba esta www.ea.aw cu a wordo traha y cu ta completamente dedica na studia na Merca y Canada. E link specifico unda cu por haya tur informacion ta www.ea.aw/studeren. Via di e link por haya informacion completo di tur e opcionnan unda cu tin un acuerdo special pa nos studiantenan di Aruba. Ta trata aki entre otro di e estadonan y universidadnan na e paisnan menciona cu cual pais Aruba tin un areglo special pa nos studiantenan Arubiano of unda cu nos studiantenan por bin na remarca pa un areglo special cu ta conta pa studiantenan di Latino America y Caribe. Entre nan e estado di South Carolina y University of South Carolina (USC), Carolina Coastal University, Florida International University (FIU), Florida State University (FSU) Panama y tambe Seneca College na Toronto Canada. Riba e pagina por haya tur informacion, documento y links unda cu por haya mas informacion di e acuerdo y areglonan special. Riba e website tambe por download e presentacionnan cu a wordo duna durante e anochi di informacion diahuebs ultimo na auditorio di Colegio EPI.

AREGLO SPECIAL

Manera a wordo anuncia durante e ultimo aña Minister Michelle Hooyboer-Winklaar, na nomber di gobierno di Aruba, a logra formalisa diferente acuerdo na Merca y Canada cu ta garantisa areglonan special na beneficio di nos studiantenan di Aruba. E areglonan aki ta encera entre otro “in-state tuition”, “out-of-state tuition waver” y tambe descuentonan considerabel riba e suma di gastonan di estudio pa tur studiante Arubiano. E areglonan aki ta un beneficio hopi grandi pa nos studiantenan y ta haci Merca y Canada opcionnan mas accesibel y atractivo pa studiantenan di Aruba.

SESSION SPECIAL

Dia 6 di November proximo lo tin un siguiente sesion di informacion cu presencia di e Director of International Student Office di Seneca College, Toronto, Canada. Den transcurso di e dianan nos dilanti lo anuncia unda esaki lo tuma lugar y e orario.