DAS evaluando paso huridico pa asunto di parkeer

ORANJESTAD – Departamento di asuntonan social (DAS) evaluando paso huridico pa soluciona asunto di parkeer. Ta obvio awor cu e problema di parkeo pa e trahadonan di DAS no ta soluciona ainda. Despues cu NoticiaCla.com a haya reaccion di minister cu tin e cartera di asuntonan social, Paul Croes, ta resulta cu e asunto tin un rabo largo, y cu e trahadonan ta evaluando pasonan huridico pa yega na un solucion. Den un comunicado emiti, nan ta mustra un lista di punto cu nan ta haya merece atencion.

SIRBIDO DI PUEBLO

Den e comunicado, nan ta mustra cu nan como sirbidonan publico, esta ambtenaarnan, ta e weso di lomba di un Gobierno. P'esey, ora cu un Gobierno no ta reconoce trabou di e sirbido publico, e ta neglisha interes general. Haciendo esaki, gobierno ta traha contra su mes tarea cu ta: proteccion di bienestar general y specificamente, proteccion di esnan financieramente y socialmente vulnerabel.

NEGLIGENCIA

Un di e forma pa neglisha interes di esnan financieramente vulnerable, a bin cu introduccion di e Landsverordening Parkeerzones. A base di e ley aki ta cobra clientenan di Departamento di Asunto Social (DAS) segun e ley Afl. 2,- y segun nan beleid Afl. 1,- pa parkeer pa ora. Personanan cu no tin, of tin poco recurso financiero mester paga pa parkeer prome cu nan haya servicio. Depende kico ta su peticion e por warda mas cu un ora. Ya caba tin casonan cu sea klem e wielnan di auto of takel auto, cu e consecuencia cu e persona lo mester a paga entre Afl.75,- pa Afl. 200,- pa haya su auto. Apesar cu Gobierno a indica cu tin 30 parkeervak pa cliente, te cu awe ningun hende sa unda nan ta.

COMPENSION DI GASOLINE

E sirbido publico di DAS, tawata haya compensacion pa gasolin ora cu e uza su auto priva. Gobierno a stop e compensacion aki, cu e consecuencia cu e sirbido publico mester uza su auto pa bay reunionnan di trabou y paga mas pa e gasolin. Awor, Gobierno ta pretende cu e sirbido publico mester paga segun e ley Afl. 75,- y segun nan beleid Afl. 60,- pa luna pa staciona su auto prome cu e por cuminsa duna servicio na esnan financieramente y socialmente vulnerable y si e bay reunionnan cu ta den e zona, e mester paga segun e ley Afl. 2,- y segun nan beleid Afl. 1,- adicional pa ora. Esnan cu mester bin reunion na DAS a laga sa caba, cu nan no ta asisti na reunionnan, paso nan no ta paga pa staciona auto.

CANTIDAD DI DIENST AUTO

Gobierno a scoge tambe pa baha e cantidad di autonan di dienst. Esaki ta trece cu ne cu e sirbido publico cu ta traha directamento cu personanan cu problema, mas ainda ta haci uzo di su auto priva, haciendo asina e gasto di gasolin mas halto p’e. Personal di DAS a manda diferente carta pa Gobierno, caminda ta splica e posibilidadnan cu ley ta duna pa alivia e situacion di esnan financieramente vulnerabel y pa e sirbidonan publico. E posibilidad segun e ley ta cu:

-       Gobierno por indica autonan cu no ta cay bou di e ley;

-       Gobierno por apunta luganan pa staciona auto cu ta wordo exonera di pagamento;

-       Gobierno por indica dia y oranan cu ta paga pa staciona auto;

-       Gobierno por bin cu un sorto di parkeervergunning caminda cu ta tene cuenta cu cierto profesionalnan, otronan cu ta duna servicio, y cu hopi biaha ta riba caminda.

PARKEERVAKKEN MARCA

Personal di DAS ta remarca adicionalmente, cu tin Departamentonan cu ta den e zona y no tin parkeervakken marca. O sea den e mesun zona no ta tur sirbidonan publico ta paga pa parkeer y e sirbidonan publico pafo di e zona tampoco ta paga pa parkeer. Finalmente, Gobierno por scoge tambe pa saca DAS pafo di e zona. Segun e posibilidadnan cu e ley ta duna por bin cu solucionnan, esaki si Gobierno tin interes di sirbidonan publico y di esnan financieramente y socialmente vulnerabel na pecho. Apesar cu personal di DAS a haya un carta dia 11 di september 2015 di Ministro President cu ta demostra su disponibilidad pa intermedia, sinembargo Ministro President te cu awe no a cumpli.

ASUNTO NO TA UN DONE DEAL

Manera indica, asunto di stacionamento di auto no ta un “done deal”, manera un sindicato cu tin miembro den DAS, a indica. E unico forma cu e ta un: ”done deal” ta, si dicho sindicato a “deal” cu e lo no atende e asunto cu ta regarda Landsverordening Parkeerzones. Pa personal di DAS: “Preocupacion di pueblo ta nos trabou” y sigur nan lo sondea posibilidad huridico pa cu e asunto aki. NOTA: Foto archivo di e accion cu DAS a tene luna pasa pa protesta e situacion di parkeermeter.