Croes: Gobierno contestando DAS riba nan problema di parkeer

ORANJESTAD – Trahadonan di Departamento di Asuntonan Social (DAS) mester a ricibi of ta ricibiendo un carta proximamente di prome minister Mike Eman, cu e solucion pa nan problema di parkeer. Segun e mandatario a splica NoticiaCla.com, den un reunion di conseho di minister anterior a wordo traha un carta di minister presidente, cu a mustra e trahadonan di DAS unda e 30 parkeerspotnan ta. A mustra nan tambe di e distancia unda cu nan por parkeer liber, y unda cu mester cumpra un parkeervergunning. “Den esaki, nos ta contestando e precupacion cu nan tabatin. E fecha pa contesta no ta conoci, pero e ta sosodiendo den e dianan aki”.

E PROBLEMA

Por corda con luna pasa trahadonan di departamento social (DAS) a protesta pa un ora, contra e introduccion di parkeermeter y e efecto cu e tin riba nan y nan clientenan. Actuando como nan vocero, Enid de Kort a splica cu mirando cu e reunionnan cu nan superiornan no a duna resultado, a dicidi di bay den accion pa un ora, y dependiendo di e resultado, nan lo a intensiva esaki. E problema cu nan tin ta cu no tin suficiente lugar pa parkeer pa nan clientenan, y pa nan tambe, nan no ta considera husto cu nan tin cu paga pa parkeer.

CANTIDAD LIMITA PARKEER

Segun de Kort e tempo ey, tabata despues di dialogo cu minister, a logra haya un total di 23 lugar di parkeer gratis pa e clientenan di e departamento siendo cu nan ta ricibi entre 90 pa 140 cliente pa dia. “Pa nos esey no ta suficiente” de Kort a bisa. E trahadonan mes tin cu paga 75 florin of tin cu haci uso di e zonanan residencial pa cu esaki. Algo cu nan no ta contento cu ne, ni esun esnan den e zona residencial. Segun de Kort, gobierno lo a informa nan cu ta un luho cu nan ta den e zona ey.

UN SERVICIO Y NEGOSHI

Apesar cu nan no ta un negoshi, nan ta un servicio pa hendenan di menos recurso. Segun de Kort, a pidi pa no cay bou di e ley di parkeer. A mustra cu na otro paisnan, servicio di gobierno ta keda cu free parking. Nos a haci nos investigacion riba esaki” de Kort a sigui bisa. “Ta parse cu gobierno ta kibra su tarea, cu ta interes general di nos pueblo cu ta ensera duna servicio na tur hende di menos recurso”. Den e area aki tin mas departamento di gobierno cu ta dunando servicio, manera Centraal Accountants Dienst (CAD) cu tambe a uni cu nan welga. Clientenan ta haya stress segun de Kort, pasobra nan ta pura pa keda cla cu nan cita, pasobra nan tempo di parkeer ta cabando. Como tal e ta crea aun mas stress. Algo cu segun e departamento, no por. 

SORPRESA PA MINISTER

E accion di trahadonan di DAS (departamento di asuntonan social) a bin como un sorpresa total pa e mandatario responsabel pa e departamento, esta Paul Croes. Segun su prome reaccion awe mainta na NoticiaCla.com, e mandatario a splica cu tin un carta di e trahadonan, cu ta duna gobierno ultimatum di 14 di september (dialuna awor) pa bin cu solucion. Pues e ta haya straño e incorecto cu ta bin cu un accion direpente diabierna.

RESULTADO DI REUNION CU MINISTER

Segun e minister e dia ey e la bisa cu enberdad a bay di acuerdo pa duna un cantidad di espacio extra gratis pa e clientenan. A papia di 80 persona cu ta bishita e departamento tur dia. Riba esaki a opta (den consulta cu colega minister Otmar Oduber), a bin cu 22 lugar di parkeer, aunke e no ta suficiente segun e trahadonan a bisa. Sinembargo, e mandatario ta mustra cu no ta tur 80 pa 100 cliente ta bin pareu. “Si bo dividi esaki pa dia, tin un cantidad cu ta bin pa ora, durante curso dia. Pa e motibo ey, a bin riba e suma di 22” Croes a sigui bisa. Ora cu a puntra e contact persoon di e grupo cuanto espacio ta necesario, e contesta nunca mas a wordo ricibi. Despues a ricibi un carta ayera tardi 4’or dirigi na prome minister Eman, cu un deadline pa dialuna 14 di september. “Awor, bo no por duna nos un deadline te cu dialuna anto walk out diabierna. Mi ta haya esey onrechtmatig. E mandatario a confirma cu e sindicato TOPA y SEPPA no por a hustifica un walk out mirando cu e situacion di nan miembronan no ta asina grave. Ta apenas algun seconde (30) e trahadonan tin cu cana pa nan yega na e zona di parkeer gratis. Esey tabata un precupacion di nan. Mientrastanto a logra haya algun lugar mas pa e clientenan di sociale zaken. “Nos ta atendiendo cu e situacion debidamente” Croes a sigura NoticiaCla.com.