Francis Dijkhoff mester rectifica declaracion contra Otmar Oduber

ORANJESTAD – E ciudadano Francis Dijkhoff tin 72 ora pa rectifica su declaracion contra minister Otmar Oduber. Asina huez a dicta awe mainta den e caso cu Oduber a entama algun tempo pasa. E rectificacion radial tin cu ensera entre otro cu e no tabatin prueba cu e mandatario ta meti den negoshi di droga, ta usa droga, y tampoco cu el a paga conocido prizonero Ospina Span pa asesina conocido personahe Johny “Poentje” Castro algun aña pasa. Pa haci esaki, huez a stipula un texto cu Dijkhoff tin cu uza pa su rectificacion. Y mirando cu Dijkhoff a declara caba cu e no tabatin intencion di rectifica, huez a impone un multa di 1.000 florin pa dia te na un maximo di 1 miyon florin.

LIBERTAD DI EXPRESION

Den e caso a bin dilanti e asunto di libertad di expresion y ki ora esaki por y no por. A determina cu ora cu tin peliger pa daña un persona su bon nomber y su situacion, por limita e expresion aki. Sigur ora cu, manera den e caso aki tabata cla, e persona cu ta haci e acusacion y expresionnan, no tin prueba contundente cu e por prueba. Segun huez, e persona cu a haci e acusacion, no por a prueba en lo minimo loke el a declara. Como tal, huez a mustra cu e persona cu ta demanda, tin suficiente base pa su peticion y como tal ta honra e peticion. Lesa e sentencia aki.