ATIA: Mester ta cauteloso riba eliminacion visa pa Colombianonan

ORANJESTAD – ATIA ta hopi cauteloso riba asunto di visa pa e Colombiano (y posiblemente pa Venezolano) drenta Aruba. Manera ta conoci, tramite ta tumando lugar pa elimina e visa pa Colombiano drenta Aruba, y tin grito pa introduci visa pa Venezolanonan awor. ATIA como gremio comercial recientemente a sugeri e visa pa Venezolano pa Aruba como un medida pa tin miho control pa e Venezolanonan bin Aruba. Y pa e asunto di visa pa Colombiano tambe nan ta skeptico. Y presidente di ATIA Michel Henriquez tin su motibonan.

NO MESTER AFECTA NOS ECONOMIA

E economia di Aruba no ta den su miho momentonan segun Henriquez, y como tal, cada ken cu bin aworaki ta trece mas presion riba e isla. “Nos mester ta cauteloso pa wak kico ta sali afo” Henriquez ta bisa, refiriendo na e asunto di posibel eliminacion pa visa di Colombia.

DECISION DI VISA TA RIBA NIVEL EUROPEO

E decision pa elimina e visa Colombiano a bin di ‘ariba’ y pa cual ATIA no a wordo envolvi pa comentario. E ta conciente cu ta algo riba nivel mas halto europeo, y Hulanda. “No ta algo cu nos tin influencia riba dje. Y nos no a pone un standpunt riba dje. Loke nos kier ta pa tin un control pa wak ken ta drenta bo pais zomaar” Henriquez a bisa. Ora cu tin visa, bo por controla esaki. Henriquez ta admiti si den mesun rosea, cu e mercado Colombiano a stabilisa basta ultimo añanan. Pues esey sikiera ta algo bon.