Mundo ta celebra ‘Back to the Future day” awe

HOLLYWOOD – Awe ta “Back to the future day”. Pa esnan cu no ta na altura di kico esaki ta, tin cu bay bek 26 aña ora cu e di dos di e trilogia di e pelicula Back to the Future cu actor Michael J. Fox, a sali riba 22 di november 1989. Den e pelicula, tur cos ta drai riba e fecha di 21 di october 2015, ora cu e protagonistanan ta bay ‘bek den futuro’ den un marca di auto ‘deLorean’ adapta. E fenomeno a crea asina un sensacion, cu a crea un ‘Back to the Future day’ awe mundialmente, cu ta trece bek hopi memoria. Pero loke ta mas impactante, ta e pronostico di futuro cu a aparece den e pelicula, cu awe a resulta di ta un hecho.

BACK TO THE FUTURE II

Mientras cu e tema di e trilogia ta basa su mes riba biahe den futuro y pasado, esun mas remarcabel ta esun di dos, cu ta ‘specula’ con 2015 lo por bira. Hopi pelicula di futuro ta bay asina leu, cu e no ta ni remoto di loke e por ta. Pero esun aki, tabata basta realistico. E prome pelicula di e trilogia, ta bay bek 30 aña, pues ta solamente valido si e di dos bay 30 aña, pero den ‘futuro’. E pelicula a resulta hopi exitoso, generando 332 miyon dollar for di un produccion di apenas 40 miyon dollar, pues a saca e placa 8 biaha.

PRONOSTICONAN

Entre e pronosticonan, tin e asina yama ‘hoover board’, cu ainda no ta un hecho, (aunke cu e ta wordo inventa ‘as we speak’). E asina yama video chat, ya caba ta existi, pero no ta necesario pa ta riba television, manera e pelicula ta sugeri, sino por caba den bo planta di man. Wak video via bo bril, por caba, via google glass, pero cu no a resulta un exito. Holograms, manera cu ta aparece den e pelicula, ya ta posibel, y pa no papia mes di e chens di Chicago Cubs bira ganador di serie mundial di baseball. Ironicamente nan ta den e playoffs cu e chens pa netamente esey, aunke nan ta 3 wega den contra aworaki. Cuminda deshidrata ainda ta wordo uza solamente pa astronautanan, pero ta existi caba (bo ta corda e pizza den e pelicula). Algun cu sigur no a materialisa, ta un sistema legal cu den 2 ora por dicta sentencia, por lo menos no na Merca, y tampoco e sequel di e franquicia di pelicula Jaws, cu segun Back to the future, lo mester a produci 19 pelicula caba. Na tur, sigur algo interesante pa futuro. Y aki na Aruba, hopi ta biba e momentonan y awe a recorda esaki den nan mesun forma, celebrando e dia, den nan mesun forma.