Henriquez: Nos no kier un flea market na cada skina di Aruba

ORANJESTAD – ATIA no tin nada contra ningun grupo di hende na Aruba. E solo hecho ta cu e ‘fenomeno’ di stroba turista etc, ta bin di e grupo di Venezolano. Asina presidente di e gremio comercial Michel Henriquez ta bisa NoticiaCla.com. Segun Henriquez, e problemanan pa e Venezolanonan a bira mas grandi awor cu banco ta frustrando nan intento pa swipe, nan ta resorta na otro forma. Aki Henriquez ta referi na e hecho cu e Venezolanonan ta cumpra producto na gran cantidad y ta bende esaki despues pafo den parkinglot.

CUMPRA Y BENDE RIBA CAYA

“Nan ta cumprando producto cu ta normal” Henriquez ta bisa. “Pero ni ami ni abo no mag di rebende. Nos no tin un vergunning p'esey. Nan no ta pagando BBO. Na Aruba nos tin regla pa haci negoshi” Henriquez a sigui bisa. E ta mustra cu na Aruba nos no ta custumbra di pone palet di cerbes riba caya y cuminsa bende sin mas. “Nos no kier un flea market na kada skina (di Aruba)” e presidente di e gremio ta sigui bisa. Berdad cu e ta yuda e negoshi di unda el a cumpra e producto.

CON E OPERACION DI VENEZOLANO TA FUNCIONA

E forma con esaki ta traha ta cu, pa cada dollar cu e Venezolano ta haya na Aruba di e benta, e tin un ganashi na Venezuela. E diferencia di e dollar legal cu nan ta haya y e loke nan por bende na Venezuela ta asina grandi cu si nan bende un producto 50% mes, nan ta haya suficiente dollar. Ora cu nan bende e cerbesnan cu nan a cumpra un rato pasa cu carchi, nan ta haya e placa cash cu nan mester, y esey nan ta bende bek na Venezuela.

MEDIDA PA TUMA CONTRA E PRACTICA ILEGAL

Segun Henriquez, tin suficiente medida cu por tuma na Aruba pa frena e asunto aki. Entre nan e ta menciona SIAD, y otro instancia cu ta cumpi cu comercio. No por ta asina segun Henriquez, cu bo ta bin Aruba bende producto sin duna bo fair share. “Esey ta un otro parti di unfair competition pa comerciantenan local”. Henriquez a confirma cu a haya reaccion di gobierno riba nan comunicado. A nota mas presencia di polis riba caya, na e parti di beach. Pero oficialmente no por bisa cu ta debi na e carta, cierto medida extra a wordo tuma.

GRUPO CHIKITO TA HACI DAÑO GRANDI

Pa loke ta e Venezolano, Henriquez ta subraya cu ta un grupo chikito ta haciendo daño pa e gran cantidad. E problema segun Henriquez, ta cu e grupo chikito sinembargo ta basta visibel na Aruba. “Pero na final, Venezuela semper tabata un bon mercado pa Aruba, y ainda tin un grupo grandi cu a bin Aruba y a inverti den entre otro condominio y kedando na hotelnan grandi”. Lamentablemente tin un grupo cu ta usando e situacion pa nan oportunidad.