STA: No a haya invitacion pa reunion riba cambio laboral dialuna

ORANJESTAD – E motibo pa cual sindicato STA, SPA, SCCA y TOPA no tabata den e reunion riba cambio laboral dialuna, ta simplemente pasobra nan no a wordo invita. Esey ta e motibo duna pa lider sindical Diego de Cuba di STA na NoticiaCla.com. “Nan no invita mi pa un fiesta, mi no tin nada di bin haci na e fiesta” de Cuba a bisa. Di parti di presidente di FTA Hubert Dirksz, e la sigura NoticiaCla.com cu no sa kico a pasa y lo bay averigua esaki.

SINDICATONAN TABATA SOSTENE GOBIERNO

Loke cu de Cuba ta haya remarcabel, ta cu e ta contento cu mayoria di sindicatonan cu a reuni dialuna, ta sindicatonan cu a sostene e gobierno actual. Pero e ta sinti cu awor a yega e momento cu e sindicatonan no por soporta mas y e ta kere cu esaki ta e comienso di e fin tambe di e gobierno aki. “E no ta duna oido na e sindicatonan y esaki a keda demostra varios biaha caba” de Cuba a bisa. “Gobierno ta haci su mes ignorante, y no ta scucha locual e dirigente di e sindicatonan ta trece padilanti. Y esaki a conduci cu e 9 sindicatonan cu a reuni a bisa cu te ey nan a yega cu e gobierno ey."

STA HOPI PODEROSO

Segun de Cuba, STA ta representa casi 40 compania priva manera AAA, Ansa, ATA, Arubus y mas. “Nos ta esun cu seguramente e cambionan cu nan kier bin cu ne y medidanan ultimamente ta dal nos masha masha duro mes”. E ta haci negoshacion di contracto colectivo hopi mas dificil. Si nan haya un invitacion ainda di e grupo di 9 sindicato, nan no tin problema pa acudi na e reunion ey. “Nos tin relativamente un bon relacion cu e sindicatonan. Pero si nan kier hunga e comedia ey nan so, nos no tin problema cu esey y nos tin nos tarea pa cumpli cu ne”.