Herde: Aruba, Corsou y St Maarten kier areglo di conflicto obligatorio

ORANJESTAD - Aruba, Corsow y Sint Maarten kier un areglo di conflicto cu ta obligatorio mientras cu Hulanda kier un conseho cu ta lag’e liber pa acepta of nenga. Asina lider di fraccion di AVP Rene Herde a declara diamars. E lider di e fraccion berde ta recorda cu na mei di e aña aki delegacionnan di e parlamentonan di e cuatro paisnan den Reino a yega na un consenso pa prome biaha den 60 aña di Statuto di Reino, pa crea un areglo pa atende cu diferencianan di opinion y cu conflictonan entre dos of mas pais di Reino.

E CONTENIDO DI E AREGLO

E areglo a ensera cu ta uza un organo independiente of crea un corte nobo pa atende cu temanan di conflicto entre paisnan di Reino. A acorda cu tur e paisnan di Reino lo ta obliga pa acepta y ehecuta e decisionnan di e corte of instancia imparcial aki. A acorda cu lo busca intermediacion den un conflicto pa purba yega na un acuerdo prome cu bay e "corte". Y a acorda cu e "corte" aki lo trata asuntonan legal cu tin di haber cu Statuto y otro ley y reglanan cu tin di haber cu Statuto di Reino. Nos tabata contento cu porfin despues di 60 aña ta yega na un acuerdo asina pa crea e "geschillenregeling" pa Reino.

CONFERENCIA DI MINISTERNAN

Na juni e aña aki e Prome ministernan di Aruba, Corsow y Sint Maarten a reuni cu e minister di Asuntonan di Reino, Plasterk di Hulanda pa concretisa e areglo di conflicto cu Parlamentonan unanimamente a acorda un luna prome. “ Pa tur hende su sorpresa gobierno Hulandes a pone e acuerdo di e parlamentonan un banda. Den su luga gobierno Hulandes a propone algo totalmente diferente”. Segun Herde, e esencia di e proposicion Hulandes ta cu no lo uza un corte existente of crea un corte special, pero lo uza e Raad van State di Hulanda como e instancia pa atende cu conflictonan. Pero pio ta cu Hulanda no kier pa e decision di e instancia aki ta mara nan. Den su luga nan kier pa e instancia no duna un veredicto, pero solamente un conseho. E diferencia ta cu un veredicto lo obliga tur pais pa tene nan mes na dje. Un conseho ta algo cu nan por djis tuma nota di dje y pone un banda. Mescos cu gobierno di Hulanda kier haci cu e ultimo conseho di Raad van State riba e 'KB' cu gobierno Hulandes a impone riba gobernador di Aruba aña pasa. Raad van State ta bisa den nan conseho cu e KB tabata ilegal. Gobierno Hulandes ta pone e conseho un banda y bisa cu e KB tabata masha bon. Gobierno Hulandes no ta sinti e obligacion pa tuma e conseho aki na serio y cambia nan maneho.

KICO AWOR?

E consecuencia di e posicion intransigente y contra di acuerdo entre parlamentonan di e cuatro paisnan di Reino aki segun Herde ta, cu gobierno Hulandes ta bolbe stroba creacion di un areglo di conflicto transparente y efectivo na cua tur pais ta mara, manera ta e caso cu un corte di husticia. Esaki ta nifica cu nos tin cu bolbe bek na mesa cu parlamentonan di Reino riba e tema aki. Esaki lo sosode durante di e siguiente reunion entre parlamentonan cu lo mester tuma luga na Sint Maarten na januari otro aña. Parlamentonan di Aruba, Corsow y Sint Maarten lo reuni prome cu esey pa fiha un punto di bista comun. “Pa nos no tin niun motibo pa desvia di e acuerdo cu nos a logra na mei e aña aki. Kiermen cu nos ta bay traha pa realisa e acuerdo di IPKO di mei 2015, pasobra e ta bon pa tur pais di Reino. Pasobra e ta duna un dimension di transparencia y democrasia na gobernacion di Reino cu e no tin ainda despues di 60 aña” Herde a finalisa bisando.