Bunita despedida pa Oscar Steba

Den Haag – Na Crematorium Rotterdam Zuid a tuma lugar un servicio di despedida pa un gran baluarte Arubiano Oscar Steba. Directora di Gabinete di Aruba Shandra John a atende e cremacion y a extende den nomber di Minister Plenipotenciario y Gobierno di Aruba su mas sentido palabra di pesame na e famia. Durante cu e bishitantenan ta drentando den e aula di e crematorio, e pianista Alwin Toppenberg a toca algun pieza entre otro 'Le Souvernir' y 'Aruba', cu ta propio composicion di Oscar Steba. Despues yiu mayor Reno Steba a tene un Memorandum pa su tata defunto, sigui pa e pieza 'El ultimo cafe', un grabacion riba CD di Oscar Steba (pianista y cantante) y Reno Steba (bahista y areglista). Alwin Toppenberg a lesa un 'In Memoriam Oscar Steba', skirbi na Papiamento pa Ramon Todd Dandaré cu cooperacion balioso di Ebby Peterson y Oscar Steba y traduci na Hulandes pa Alwin Toppenberg. Por ultimo Alwin Toppenberg a toca y canta e pieza 'Despedida' di dr. Rudy Chan y Padu Lampe. Na final e bishitantenan a tuma despedida di e defunto Oscar Steba y por a condoleer e famia.