Aruba campeon overall synchro na Barbados

ORANJESTAD - Aruba a logra bira e pais campeon den ambos categoria di edad cu un total di 6 medaya di oro, 1 medaya di silver y 1 medaya di brons. Esaki a haci cu Aruba a haya e total di 416 punto. Jamaica a sigi na di dos lugar cu 214 punto. Na di tres lugar a keda Barbados cu 50 punto.

E mihor atletanan di Aruba a competi den solo, duet y team. Banda di esaki e atletanan a competi den figuras. Esaki ta e parti sin musica den cual cada atleta ta mustra con e ta domina e tecnica di landamento sincroniza, cu ta asina importante pa haci un bunita rutina cu musica.

AZB (Arubaanse Zwem Bond) su seleccion di Landamento Sincroniza den categoria "12 anja y menos" y "13-15 anja" a representa nos isla na e di 20 edicion di Caribbean Islands Swimming Championships (CISC) na Barbados.

Aruba a participa cu un atleta den e categoria di edad "12 anja y menos" den e evento di Solo, y a logra e medaya di oro. Victoria Geurts di 10 anja a duna un bunita presentacion di solo, hopi intenso y cu un dificultad halto. Den e categoria di Duet Zurienne Dabian y Meghan Tromp, ambos di 11 anja, a duna un rutina riba un ritmo liher di "Angry Birds". Nan a mustra hopi sincronisa y cu e expresion di cara corecto. E intencion ta pa e atleta nunca mustra cu e ta cansa y usa expresion sincronisa cu ta pas cu e tema y musica di e rutina.

Den e categoria di edad "13-15", Abigail de Veer, den e evento di Solo a laga tur su competidornan atras cu un rutina cu dificultad hopi halto, bon ehecuta y hopi artistico. E Solo ariba musica Rock a zona duro den e tribunanan na Aquatic Center na Barbados y laga tur e espectadornan babuca. Esaki ta un medaya di oro bon mereci. Den e mesun categoria di edad, Aruba a participa cu dos Duet. Isabella Noguera y Talisah Beke a duna un bonita presentacion y nan Duet tabata cu un musica cu ta keda bira mas liher ,y den cual ta mustra cu ta un show di pia so bo ta wak. E espectadornan ta keda pensa ta ki ora e atletanan ta logra hala rosea! E otro Duet tabata di Anastacia van Daal y Rizhaylee Bello, y nan a ilustra den nan rutina un storia di popchinan cu ta haya bida, ta bira asina contento y ta haci un show pa mundo henter wak con bon nan ta. E ligereza di nan tecnica den e Duet aki pa ilustra movecionnan di popchi tabata increibel y a haya hopi aplauso. E dueto aki a logra haya e medaya di oro pa Aruba.

E Team "12 anja y menos" di Aruba cu ta consisti di Victoria Geurts, Zurienne Dabian, Meghan Tromp, Janelly Pina, Sarah Silva, Casey-Ann Hermosen y Chante Martes a duna un presentacion riba e ritmo di e pelicula Madagascar. E rutina hopi pret aki, bon ehecuta y sincroniza a logra cu Aruba a gana e medaya di oro.

Den e competencia di figura Aruba a sali den e top 8 di e 16 atletanan di "12 anja y menos" cu oro pa Victoria Geurts, silver pa Zurienne Dabian y brons pa Meghan Tromp. Den "13-15" e atletanan di Aruba a sali den e top 5 di e 7 atletanan cu oro pa Abigail de Veer, silver pa Anastacia van Daal y brons pa Talisah Beke.

E delegacion di Aruba a consisti di 12 atleta, coachnan Alva Torres y Yami Romay Arias, lider di delegacion Zulema Dabian, miembro di comite tecnico di Aruba Natascha de Veer y como Juez di Aruba Amanda Maduro.

Por conclui cu e nivel di Aruba ta hopi halto den e region di Caribe. Un biaha mas ta keda demostra esaki den CISC 2014. Esaki ta danki na tur e oranan y disciplina cu e atletanan, coaches, mayornan y Comite Tecnico di Aruba ta hinca den e deporte aki. E amor pa e deporte, motivacion y e deseo di cada atleta pa un dia representa Aruba na un competencia mundial ta haci e deporte aki grandi na Aruba.

Ta di remarca cu den e region e deporte di Synchronised Swimming no ta den su temporada mas mihor. No tin mucho representacion di nivel halto. Y hopi pais den region ta mira Aruba pa lidera intercambio di experiencia y conocimento riba e deporte aki. Den e cuadro aki e unico club di Landamento Sincroniza di Aruba, "Barracudas Synchro Club Aruba" lo kier contribui, pero pa bienestar di e desaroyo di e atleta e club lo purba enfoca pa mas atleta competi na competencianan den otro region manera esun Europeo. Den esaki ta spera riba cooperacion di e Federacion di Natacion di Aruba y Comision di Subsidio di Aruba.

Na Augustus benidero e testnan di synchro lo tuma lugar un biaha mas pa muchanan cu kier purba e dushi deporte di Landamento Sincroniza. Sigi Barracudas Synchro Club riba Facebook pa mas informacion.