Power 101.7FM cu otro exitoso programa di quiz, “Kibra Cabez”

PIEDRA PLAT – Despues di e exitoso serie di wega radial Hunga Cumi, e emisora popular Power 101.7FM a estrena su siguiente hit game show radial, titula ‘Kibra Cabes’. E ta un radio quiz show semanal unda durante 10 siman largo, 5 hende ta bin hunto pa ‘kibra cabes’ pa duna e contesta corecto riba 7 serie di 5 pregunta. Un total di 5 locutor di e emisora, ta lidera su respectivo team di 5 hende. Y cada siman un locutor ta presenta cu su team, y purba nan suerte cu ‘kibra cabez’.

PROME PROGRAMA

Diasabra ultimo, pa 2 ora largo, e prome programa di ‘Kibra cabez’ a inicia pa 10’or di mainta, unda cu e locutor conoci Julie Julie y su team mester a purba nan suerte. Pa motibonan logistico, e ekipo tabata consisti di 3 persona so, pero esey no a haci e programa menos interesante. Durante 7 serie di pregunta, variando di pregunta riba Aruba, tema general, musica, trafico, te na un seccion cu e comerciante patrocinante mes a crea. Na final, e ganador di e prome programa, a resulta di ta Donna Lee Kock, cu hunto cu Stephany Gamarra y Maria Geerman a participa. E proximo programa ta diasabra awor 24 di october, unda cu e proximo locutor lo ta conocido Beatz Entertainment cu lo presenta cu su team di 5 persona. No lubida di sintonisa e programa en vivo atraves di Power 101.7FM.