Gobierno evaluando cambio di ley di estadia y admision pa Venezolanonan

ORANJESTAD – Gobierno ta evaluando e.o. cambio di ley di estadia y admision pa Venezolanonan cu ta bishita Aruba. Kico exactamente esaki kiermen, no ta determina ainda. Prome minister Mike Eman por a bisa NoticiaCla.com solamente awe mainta cu den e dianan aki den conseho di minister, a tuma diferente decision cu e diferente ministernan cu ta bay reuni cu nan departamentonan pa mira con por ehecuta e decisionnan aki. Y na momento cu yega na un consensus riba con por ehecuta nan, pa por yega na un esfuerso hopi coordina pa duna tur e trankilidad cu nos comunidad ta desea, lo anuncia esaki tambe pa medio di e diferente ministernan.

REUNION ENTRE MINISTERNAN

E situacion actual di e problema di un cierto grupo di Venezolano cu ta ‘apoderando’ di nos isla, tin atencion di gobierno. De hecho, premier Mike Eman a confirma na NoticiaCla.com dialuna, cu e reunionnan cu tur minister e dianan aki (“as we speak”), ta pa nan ta prepara pa cada ministerio atende cu e asunto di e miho forma pa sigura cu e no bira un problema.

PROBLEMA DELICADO

E problema ta keda algun delicado, mirando cu ta trata di un grupo, cu no ta representa e totalidad di e colonia Venezolano. Como tal, gobierno tambe ta na altura di esaki y kier trata e caso cu e delicadesa mas miho posibel. “Ta trata di un bisiña, un pais cu semper nos tabatin un relacion historico cultural, pero tambe riba tereno di turismo” Eman a bisa. Y pa no menciona mes cu e tabata e prome mercado di turismo pa un tempo.

VENEZOLANONAN CU OTRO META

E situacion enberdad segun Eman, ta mustra toch cu tin un grupo cu ta bin Aruba (for di Venezuela) cu metanan otro cu solamente turismo of pasobra nan tin propiedad na Aruba. “Nan ta bin pa motibonan socio economico”. Segun Eman, ta importante pa e ambiente den cual nos ta ricibi hende, semper ta keda refleha e cordialidad di pais Aruba. Esey no ta kita afo cu mester mantene e normanan cu e cuida di orden publico, y busca e ekilibrio ey. Y p'esey, ta papia di diferente decisionnan cu e ministernan tin cu tuma, por pensa en general, riba e.o. decisionnan cu ta fortifica e forma con nos ta percura pa e leynan di admision, y estadia na Aruba por tin un bon coordinacion cu tur instituto.