Eman: Ta premira cu fin di aña por elimina visa pa Colombiano

ORANJESTAD – Eliminacion di visa pa Colombianonan bishita Aruba, no ta sosode aworaki. Por lo menos, no segun informacion cu prome minister Mike Eman tin. E ta reacciona asina riba pregunta di NoticiaCla.com, cu tin informacion cu posiblemente fin di luna aki, e visa lo por a wordo elimina caba pa Colombianonan. Mas cu e por a bisa, ta cu e tambe a tende e ‘rumornan aki’, pero no via un canal oficial. E informacion cu e tin, ta cu mas sigur fin di aña, esaki lo sosode.

PALABRACION CU KOENDERS

Segun e mandatario a splica NoticiaCla.com, tin un palabracion haci cu minister di relacionnan exterior hulandes Bert Koenders, cu ora cu e decision pa elimina e visa aki wordo ehecuta dor di Schengen (paisnan europeo y islanan BESS), e momento ey tambe Aruba lo haci esaki simultaneamente. Y e informacion cu NoticiaCla.com tabatin, ta cu esaki lo mester a sosode 1 di november awor. Algo cu e mandatario no por a confirma.

DIFERENTE CU CORSOU Y ST MAARTEN

Aruba a mustra algun luna pasa cu, contrario cu Corsou y St Maarten cu si a bay pa e eliminacion mesora di e visa ey, e mester di mas tempo pa prepara pa e parti administrativo cu ta bin cu e cambio aki. “E tin un impacto grandi pa nos turismo, pero tambe cierto trabou adicional pa imigracion, cu naturalmente mester percura cu esnan cu bin como turista, ta bin como turista di berdad”.

SCHENGEN

E unico cu e mandatario por a confirma, ta cu ta canando simultaneamente cu Schengen, pues cu lo implementa e cambio simultaneamente. Pero mas no. “No ta den nos man pa por anuncia e momento” Eman a bisa. Solamente lo keda coordina cu departamento di relacionnan exterior Hulandes pa por tin un bon salida. E fecha pues, ta mas fin di december, comienso di aña por tin e cambio.