Croes: Lo discuti cambionan laboral den Conseho di Minister

ORANJESTAD - Minister di Labor Paul Croes a tuma nota di e reaccion di FTA riba e proposicion di e cambionan den e ley laboral den e codigo civil. Dialuna anochi el a reacciona riba e topico aki. "Durante e proceso legal tin varios momento cu e cambionan den e ley aki ta wordo discuti prome cu esaki yega Parlamento”. Na e momentonan aki Departamento Huridico ta hasiendo e amiendanan proponi a base di discusionnan den tri-partiet pa asina oficialmente entrega esakinan na Gobierno di Aruba Croes a bisa.

PRESENTA NA CONSEHO DI MINISTER

Minister di Labor na su turno lo presenta esaki na Conseho di Minister pa asina manda esaki Parlamento pa por vota riba esaki", Minister Paul Croes a mustra. E cambionan proponi ta varios y lo trata esakinan den un reunion publico na dado momento. Den e cambionan aki, Minister Paul Croes lo kier informa Parlamento di Aruba tambe riba e proposicionnan presenta, pa asina nan ta bon informa di esaki. Prome cu e ley aki yega Parlamento, conseho di Minister lo duna su aprobacion na esaki.

LEY TA BASA RIBA EO. RAPPORT IMF

Tin alrededor di 15 cambionan den e ley cu ta wordo proponi y un di esunan mas discuti ta e articulo 1613X. Minister Paul Croes su posicion den esaki ta basa riba consehonan di Conseho Consultivo, raportnan di IMF y expertonan huridico den leynan laboral. "Na momento cu nos recibi e cambionan proponi manera ami como Minister a propone, lo mi presenta esaki na Conseho di Ministers pa asina discuti y finalmente manda esaki Parlamento di Aruba", Minister Paul Croes a conclui.