Oduber: Prueba cu compra di ‘klem’ di Aruparking tabata ok

ORANJESTAD – Den un intento pa para e critica, -particularmente di opositornan politico y no politico-, dialuna mainta Minister Otmar Oduber cu ta responsabel pa e proyecto di parkeermeter, a bin cu documento pa logra esey. Uno pa uno, e mandatario a splica tur e punto ‘no corecto’ y pa medio di documentonan, a purba mustra cu documentonan den man con esnan den oposicion a bin ta gaña comunidad y a presenta e pruebanan di con e situacion real ta pa loke ta trata parkeermeters na nos isla.

SUMA GENERA PA AÑA

Segun Oduber, den ultimo simannan hasta ex lider di e partido geel, Nel Oduber a wordo saca for di su cunuco pa bisa comunidad cu 20 miyon florin ta wordo ranca for di e pueblo cu e proyecto di parkeermeters. Contrario na e declaracion aki, Minister Oduber a bisa cu si parkeermeters genera 2 miyon florin pa aña lo ta hopi bon. E suma aki lo bay directamente pa Arubus pa por mantene e subsidio ofreci na diferente gruponan den nos comunidad, manera ta e pensionadonan y muchanan di scol.

EDIFICIO DI ARUPARKING

Otro mentira presenta pa oposicion ta cu e edificio unda Aruparking ta ubica ta costa 75 mil florin pa luna siendo cu e suma cu ta wordo paga pa huur pa luna ta 5.500 florin. A confirma cu e edificio ta di un familiar di dje, pero cu simplemente nan a cumpli mihor cu tur otro cu a keda acerca.

PLACA PA KLEM

Un otro mentira segun Oduber cu oposicion a presenta ta cu lo a paga 220 mil florin pa 30 klem cu a wordo cumpra. Contrario na esaki, segun Oduber, a cumpra un total di 50 klem na 46 mil florin. “Ora esaki a bin dilanti a bai over na e campaña di bisa cu riba cierto website nan por haya e klemnan na 80 florin, cual por ta logico, inclusive lo por haya klemnan di hasta 5 dollar. Diferencia grandi ta cu e klemnan cu a wordo cumpra pa Aruba a traves di un compania, ta di hero y di un bon calidad” e mandatario a bisa. Oduber a mustra tur prensa presente e documentonan en cuestion y hasta a mustra e invoice cu a wordo uza na Aduana.