Congreso Oncologia y Hematologia a demostra colaboracion esencial pa Aruba

ORANJESTAD - E congreso multidisciplinario di Oncologia y Hematologia organisa pa e departamento di oncologia di Dr. Horacio E. Oduber Hospital siman pasa a conta cu participacion di profesornan y otro expertonan hopi conoci riba tereno di investigacion y tratamento di cancer y malesanan di sanger. E congreso a wordo reconoci pa Hulanda como un encuentro di importancia y hopi balor y a otorga esunnan cu a atende un nivel halto di punto di acreditacion.

DIRECTOR FINANCIERO DE KOOL

Director Financiero di Hospital, Drs. Theo de Kool a expresa cu e congreso ta demostra cu Hospital ta participa na desaroyonan grandi y semper ta busca e miho posibilidadnan pa yuda nan pashentnan. El a agrega cu e congreso, di un caracter multidisciplinario, ta subraya e importancia di colaboracion. Hustamente riba un isla, unda cu posilidadnan ta limita, e colaboracion aki ta esencial, Theo de Kool a bisa enfaticamente. Pa medio di intercambionan manera e congreso, Hospital ta yuda su pashentnan na e miho forma, cu ideanan nobo y un comienso nobo. Durante di e congreso a refleha cu e hospital di Aruba ta un hospital di berdad y no un hospital riba un isla chikito y sin posibilidadnan, segun De Kool. El a conclui bisando, “Nos por hopi, nos ta haci hopi y nos por ta orguyoso di loke nos ta logra. Esey e congreso aki ta demostra.”

ONCOLOGO JONKHOFF

Oncologo Hematologo di enfermedadnan di sanger, dr. Roel Jonkhoff ta un di e organisadonan di e congreso. E congreso aki ta importante pasobra e ta pone Aruba “riba mapa” y lo mester yuda cambia y mehora e percepcion di hendenan na Aruba tocante di e cuido di salud.  El a splica cu den su añanan trahando aki, el a ripara cu pashentnan ta bay pa un di dos opinion Colombia of Santo Domingo; nan ta gasta nan placa y bolbe sin tratamento. Jonkhoff a bisa cu e pashent por ta sigur cu si tin un of otro forma pa trat’e na mundo, hospital lo busc'e y cu hopi cos por wordo haci na Aruba y hendenan por tin mas confiansa den e sistema.

CANTIDAD DI PARTICIPANTE

E congreso a conta cu 150 participante, incluyendo dokternan y analistanan, como tambe specialistanan den radioterapia (bestraling). E participantenan ta for di Aruba, Colombia, Republica Dominicano, Merca y Surnam, Hulanda y e otro islanan di Reino Hulandes. A conta cu 30 orador, incluyendo cuater for di Merca, cual dos ta di e centro di tratamento di cancer prestigioso MD Anderson. E congreso a consisti di dos dia pa profesionalnan medico y un dia pa publico.

DARYANANI

Ciruhano Oncologo dr. Deepu Daryanani a agrega cu e congreso no lo wordo organisa na un base anual pasobra lo ta dificil pa logra haya tur e expertonan di un nivel asina halto hunto cada aña na Aruba, pero ta mantene como meta pa e siguiente tuma luga na 2017. El a splica cu e prome dia a concentra riba cancer di colon y cancer di pecho y e di dos dia mas riba cancer di prostaat y cancer di nier, entre otro. A presenta investigacionnan hopi importante, datonan interesante y tambe e ultimo disponibel y obtenibel riba nivel di medicina y tratamentonan. El a bisa cu un di e presentacionnan cu tabatin un impacto grandi tabata esun di e dokter di MD Anderson cu a presenta e Wubbo Ockels Lecture como parti di e discusion tocante di renal cell carcinoma y tur e desaroyonan nobo cu tin riba mercado pa yuda pashentnan di e tipo di cancer aki tambe.

MINISTER SCHWENGLE

Minister di Salud Publico, dr. Alex Schwengle a expresa cu e ta hopi orguyoso cu e specialistanan a tuma e iniciativa y a logra di organisa un excelente y exitoso congreso. El a agrega cu prome cu el a asumi e funcion di minister, e tabata parti di e team di organisacion tambe. El a keda impresiona cu e acreditacion cu e congreso a ricibi pa e diferente areanan di e profesion/specialisacion. Ta importante pa Aruba demostra kico ta wordo haci riba e isla, y discuti kico ta bay bon y kico falta, entre otro. Concluyendo el a bisa cu un di e topiconan discuti tabata radioterapia, y cu ta trahando riba esaki caba.