Kerndoelen presenta na docentenan di tur kleuterschool

ORANJESTAD - Mas di 150 docente di scolnan preparatorio a participa diaranson na e prome di un serie di presentacion y tayernan tocante di e introduccion di “Kerndoelen” pa enseñansa primario. E facilitadonan a presenta e documento cu e kerndoelen den un sesion plenario, sigui pa diferente tayer. Tur docente di tur scol preparatorio y primario (basisscholen) di Aruba den e siguiente dianan lo atende e presentacion aki.

KERNDOELEN

E kerndoelen ta algo cu a boga p’e den enseñansa pa bastante tempo; a traha duro riba su realisacion y hustamente awo, den Luna di Enseñansa, a logra keda cla cu e parti di “rekenen/wiskunde”, esta matematica, pa e wordo presenta y, consecuentemente implementa. Berthson Boekhoudt, kende ta traha na Instituto Pedagogico Arubano como docente, a splica cu e kerndoelen ta indica tur loke e mucha mester sa di rekenen/wiskunde na final di zesde klas. E documento ta contene un liña di cla di e contenido pa sigui for di cuminsamento di scol preparatorio te na final di scol basico.

KICO E WERKDOCUMENT TA ENSERA

E “werkdocument” ta un instrumento nobo cu ta pone tur scol basico riba e mesun liña pa cu e rekisitonan di topiconan y conocemento minimo cu e hoben mester a wordo ofreci den cada klas pa cu su preparacion pa su ingreso na un scol secundario.

E ta un documento oficial cu tur klas y scol mester cumpli cu ne y ta pone tur scol na e mesun nivel minimo pa cu e materialnan y topiconan cu ta wordo ofreci na e alumno. Scolnan tin un liña cu nan ta siguiendo caba, Berthson Boekhoudt a comenta, e docentenan tin cierto rekisitonan cu ta estableci na nan scol, pero esaki ta un documento cu oficialmente ta pone nan tur riba e mesun liña.