Gobierno ta presenta Angel Bermudez awe tardi

ORANJESTAD – Dialuna atardi, gobierno di Aruba ta presenta su minister di mas nobo di e gabinete Mike Eman II, sr Angel Bermudez. Bermudez tabata minister caba den e prome gabinete Eman ora cu Aruba a haya su status aparte na 1986 y a fungi como minister di e.o. Transporte pa 2 aña. E tin experiencia amplio riba tereno di impuesto, y fiscal y a fungi ultimo como hefe di e departamento na islanan BES. Ultimo e tabata consehero principal di ex minister Juan David Yrausquin, cual funcion e la tene te ora cu Yrausquin a baha algun siman pasa.

Tabata siman pasa den un comentario exclusivo pa NoticiaCla cu Bermudez a confirma cu e la tuma su decision pa e funcion, despues di analisa y consulta cu su famia y achterban. E tempo ey e la bisa NoticiaCla cu e no tabata mucho interesa pasobra e la yega di hacie caba, y sa kico e trabou ta. Pero si haci un apelacion, e lo a pens’e. Despues di a pens’e, e la dicidi cu e ta acepta. Gobierno di su turno a sigui cu e pensamento y a         formalisa e candidatura te cu gobernador a manda pidi parlamento siman pasa pa un comentario. Mayoria di parlamento den comision central a acepta, cu excepcion di oposicion.

De hecho, partido MEP a declara publicamente diadomingo cu nan ta contra e candidatura aki. Segun e partido MEP no tin nada contra e persona di sr. Bermudez, pero si contra e hecho cu Mike Eman kier hasi. Ademas MEP ta contra e procedura cu a wordo sigui. Y e partido ta cita 5 punto. Entre nan, cu gabinete Mike Eman II tin cu baha bek pa 7 minister, a manipula den eleccion 2013 pasobra ta pone un vakminister y no un persona cu a bay eleccion, cu e screening no a tuma lugar pa gobernador sino Mike Eman, cu Bermudez tin un contract miyonario caba, y cu si awor rolnan ta bira y cu si ta Juan David Yrausquin ta bira consehero principal di Bermudez. Cada un di e puntonan aki ta wordo subraya den un comunicado (lesa e comunicado aki) cu e partido a emiti.