Gantry crane nobo di waf di Barcadera operational na december

ORANJESTAD – Waf nobo di Barcadera ta den e fase final di construccion. For di algun luna caba ta trahando riba e ‘Grantry Crane’ nobo cu ta proyecta pa ta totalmente funcional entrante december proximo. Algo cu a hala hopi atencion e ultimo dianan aki, ta grandura di e crane y cu por tuma nota di dje for di basta leu. Expertonan ta tranando riba e crane nobo aki pa algun luna caba y diahuebs ultimo tabata asina leu cu a hisa e structura na e nivel rekeri (cu un haltura maximo di mas di 70 meter). 

CRANE NOBO

E crane aki ta uno completamente nobo cu ta tuma trabou over for di e crane bieu, na waf di Oranjestad, cu ta sali for di servicio na momento cu e mudamento keda finalisa principio di otro aña. N’e waf Nobo di Barcadera, una bes cu e ta full den servicio, ta bay conta cu 2 crane; e Gantry Crane y tambe un crane mobil cu a wordo cumpra 2 aña pasa pa A.P.A. N.V. “Nos ta hopi contento di mira cu tur cos ta canando segun plan y ta sigui dirigi pa nos ta asina leu januari, februari otro aña cu nos por mira e waf nobo di container na Barcadera den operacion.”

CRANE EFICIENTE

Segun ing. de Meza, e Gantry Crane nobo ta sumamente eficiente cu energia y ta haci uzo di programanan sofistica pa su operacion. “E ta full un operacion nobo, caminda cu e operadornan di e crane aki ta haya training specialisa di diferente programa, tecnologianan nobo cu ta wordo uza, pero tambe debi na e grandura di e crane.” E crane aki, segun de Meza su palabranan, “ta parti di historia pa sigur e siguiente 50 añanan nos dilanti.”