De Ruijter: No tabatin prueba nobo den caso Hard Rock/Bushiri

ORANJESTAD- Contrario na e declaracion di ministerio publico, ciudadano Jan de Ruijter ta sigura NoticiaCla.com den un reaccion riba e sentencia di siman pasa, cu e no a presenta ningun informacion ‘nobo’. Esey ta importante mirando cu segun ministerio publico na NoticiaCla.com, ta esey (e presentacion di puntonan nobo), a pone cu nan a opta pa continua cu e investigacion riba e caso di fraude den caso Bushiri hotel/Hard Rock Hotel. “Mi tin tur comprension cu diferente aspectonan di mi “pleitnota” tabata nobo pa e “advocaat-generaal”, de Ruijter ta bisa. “Berdad ta cu no tabata trata di hechonan nobo, pasobra e puntonan semper tabata parti di mi keho caba, pero pa e “advocaat-generaal”, kende te awor aki no tabata envolvi den e caso Hard Rock, si nan tabata nobo” de Ruijter a declara na NoticiaCla.com den un reaccion skibi.

NO KIER BISA KICO E PUNTONAN TA

De Ruijter, riba pregunta di NoticiaCla.com a prefera pa no contesta cua puntonan esnan menciona ta. Algo cu e website a pidi specificamente, esta cua ta e puntonan ‘nobo’ aki. “Di cua puntonan ta trata aki specificamente, lo mi no divulga na e momento tempran aki. Mi ta kere cu esey no ta na ami pa haci” de Ruijter a sigui bisa. “Durante e investigacion – y esaki principalmente di acuerdo cu mi propio reglanan di etica – lo mi no mag di haci anuncionan tocante e caso, y mi ta spera cu e “advocaat-generaal” lo por haci su investigacion den tur trankilidad y liber di cualkier sensacion”.

PAKICO TA MENCIONA ODUBER SO Y NO OTRONAN

Manera ta conoci, diarazon ultimo, dia 14 di october 2015, Hof na Aruba a trata e keho contra e decision di Ministerio Publico pa pone den buki di olvido (“seponeer”) su keho anterior contra minister di Turismo Otmar Oduber. Oduber a mustra mientrastanto na NoticiaCla.com, cu mester corda, cu mientras cu enberdad su persona tabata un di esnan cu tabatin keho contra, tabatin 12 otro hende mas tambe. “Tres huez a absolvi mi di tur culpabilidad den e caso aki” Oduber a recorda NoticiaCla.com riba e tema aki.

E CASO MES

Segun de Ruijter, despues tabatin un sesion di pregunta y contestacion (“Q & A” – questions and answers), unda e mester a contesta preguntanan di e hueznan; tabata remarcabel segun de Ruijter con liher e hueznan tabata sa di percibi e diferencia entre asuntonan principal y asuntonan di menos importancia, y finalmente a haci pregunta tambe na e “advocaat-generaal” di Ministerio Publico cu tambe tabata presente. E “advocaat-generaal” ta representa Ministerio Publico den casonan den corte superior (Hof).

OPINION DI VEREDICTO

Durante e sesion di Q. & A. segun de Ruijter, a sali na cla cu e miembronan di Corte tabatin preguntanan cu tabata dificil pa e “advocaat-generaal” contesta, y cu tabata nobo pa esaki. “Corte tabata di opinion cu e preguntanan mester ser contesta, y pues mester ser investiga; e “advocaat-generaal” tabata completamente di acuerdo cu esey.” Segun de Ruijter a sigui conta, despues di un receso cortico, e ora ey mes, pues ainda durante di e caso, a bay di acuerdo cu e oferta di e “advocaat-generaal” pa cancela e “seponering” anterior, y haci un investigacion adicional relaciona cu e preguntanan especifico di Hof. “Por haci pues comosifuera e caso no a tuma lugar, y si mi persona no ta contento cu e investigacion, lo mi por bay back Corte atrobe. Mi ta sumamente satisfecho cu e resultado aki. Cu esey ta parce cu mi deseo a wordo cumpli. Dia 2 di december 2014 mi a entrega un keho contra minister Oduber y un lista largo di complicenan, y e keho ey ta bay ser trata awor. Exactamente manera mi a spera (“verwacht”). E fase final a cuminza, y awor husticia mester cana su caminda. Husticia lo vence, di esey mi ta convenci” de Ruijter a finalisa bisando.

MINISTERIO PUBLICO RIBA E CASO

Ministerio Publico lo tin cu haci mas investigacion den e caso di posibel fraude di bidding Bushiri Hotel/Hard Rock Hotel y e keho cu ciudadano Jan de Ruijter a entama contra e.o minister Otmar Oduber. Esaki basa riba informacion nobo cu nan a ricibi durante tratamento di e apelacion di de Ruijter e siman aki. Asina ministerio publico su vocero Ann Angela a reacciona diahuebs siman pasa riba pregunta di NoticiaCla.com. 

FAYO

For di Angela a compronde cu no ta asina cu Hof a dicta fayo den e caso y ordena pa Ministerio Publico habri e caso bek y cuminsa un investigacion penal contra esnan cu a entrega keho contra. De hecho, segun Angela, Hof a declara e peticion di e persona cu a apela, esta Jan de Ruijter, como no admisible, basa riba e hecho nobo aki y a bay di acuerdo cu OM pa sigui cu e investigacion. Como tal no tabata necesario pa dicta un sentencia y e peticion di de Ruijter no tabata relevante mas.

INFORMACION NOBO

Loke a sosode segun Angela, ta cu durante e apelacion, diripiente de Ruijter a presenta ‘informacion nobo’, cual Ministerio Publico mester bay analisa awor pa por tuma un decision nobo. Y basa riba e analisis nobo aki, Ministerio Publico lo dicidi si ta bay inicia un investigacion penal of no.

APELACION

De Ruijter, cu no a keda contento cu Ministerio Publico a dicidi pa no persigui ningun hende y no inicia un investigacion penal den e caso di supuesto fraude cu Bushiri/Hard Rock hotel, p'esey ela inicia un procedura segun articulo 15 di Codigo di Procedimiento Penal. Esaki ta regarda e decision pues di OM pa no cuminsa un investigacion penal basa riba e keho entrega contra minister Otmar Oduber.