Aruparking a desmenti prijs halto paga pa klemnan di auto

ORANJESTAD- E asunto di prijs di klem cu Aruparking ta usa pa ‘multa’ automobilistanan cu ta parkeer robez, a haya un rabo mas largo. For di basta tempo opositornan ta mustra cu imagen di internet, cu e loke cu ta cobrando pa reemplaza un klem destrui, ta mucho halto compara cu e prijs real. For di momento cu a cuminsa klem auto recientemente, algun automobilista a haya nan den problema ora cu nan a purba kita e klemnan aki. Gastonan di 1000 florin a bin pa nan cuenta, siendo cu segun opositornan, e prijs ta hopi menos. Casi 900 florin menos. Como tal Aruparking a haye ta bin dilanti pa duna nan banda di medaya. 

PRIJS DI UN KLEM

Segun Aruparking, contrario na locual a wordo publica den algun medio Aruparking kier a clarifica cu e compra di klemnan di Aruparking a bay via di e compania All-In-Energy cual ta representa e compania Mackay Meters cual ta e compania na Canada cu ta encarga cu Parkeermeters y Klem. Segun e compania, mester aclarea cu akinan a cumpra un total 50 klem y caminda a paga e suma di Awg 926.25 pa cada klem cual a suma un total di Awg 46312,50 y no e suma astronomico cu ta wordo menciona pa individuonan cu por tin otro meta nan tras. Tambe mester menciona cu e klemnan aki ta bin cu un garantia di 1 aña. Problema sinembargo, ta cu ora bay riba e website di e compania Mackay Meters, e no ta mustra cu e ta ofrece e klemnan cu Aruparking ta sigura cu a wordo cumpra di nan. E unico producto cu e compania ta propaganda, ta e varios tipo di parkeermeter obtenibel, y tambe e software. No ta conoci si Mackay Meters a busca e klemnan di un otro compania, y cu a actua como un provedoor e biaha aki. (Mira e website di Mackay Meters aki). Ademas mas investigacion ta mustra cu entre otro riba website di un compania di Canada, e suma paga ta hopi menos cu e 926.25 cu Aruparking a bisa cu nan a paga p'e. 

CONSIDERACION

Mes momento, e compania a probecha di un biaha mas, mustra e puntonan cu nan a tene cuenta cu ne, pa haci e introduccion di e parkeermeter mas suave. “Mirando cu na cuminsamento di e proyecto, hopi hende a pidi pa Aruparking tene consideracion cu diferente aspecto di e tarifanan, nan a dicidi despues di algun siman di operacion di trece un ahuste den e tarifanan pa asina por ta mas atractivo pa un y tur” nan ta cuminsa splica atrobe. A pone cu por paga 1 florin pa 30 minuut y tambe 2 florin pa 1 ora y mey.

REDUCCION TARIFA

Tambe a baha e tarifa mensual pa esnan cu tin Werk Parkeervergunning cu 20 % caminda e la bira Awg 60,- pa luna. A introduci e Aruparking Smartcard pa haci pagonan mucho mas facil pa no mester cana cu placa larga tampoco y caminda cu Smartcard semper por paga e suma exacto cu mester. Entretanto ta bezig cu banconan tambe riba posibilidadnan pa usa Credit card y Debit cards. E machinnan tambe ta tuma tur coins di dollar Mericano, pa asina ta mas facil pa e turistanan, solamente e machine no ta acepta ningun placa di papel.

SEGURIDAD

Encuanto seguridad a busca compania di seguridad cual lo t'ey na e areanan unda lo por tin menos seguridad for di 7or di mainta te cu 12 or di anochi pa asina yuda controla e autonan y tambe esnan cu ta bay busca nan auto cual ta para eynan sea durante ora di trabou of ora nan bay shop den caya grandi. A papia tambe cu nos companianan di utilidad caminda lo bay pone lusnan grandi na e lugarnan menciona, pa esaki tambe yuda pa tur hende cu a parkeer nan auto por ta mas sigur lagando nan auto atras y tambe na momento di bay back pa busca nan auto.

RECARGA PARKEERMETER

Splicando un biaha mas e parti di parkeer auto y bay haci compras, mester menciona cu no mester bay back na e machine original pa añadi tempo, mirando cu riba e recibo existente cual bo ta keda cu ne na momento di paga pa parkeer, por recarga bo tempo extra na cualkier machine cu ta mas serca di bo na e momento ey usando simpelmente e number di e recibo. Tambe nos kier splica cu den caya principal mes lo bin algun machine cual lo haci hopi mas facil na momento di haci compras y mester recarga bo espacio di parkeo. Aruparking ta trahando tambe riba un App pa telefon caminda na un manera masha facil por cumpra of añadi tempo na bo espacio di parkeo via bo cellular.

ARUPARKING

AruParking ta existi desde November 2014 y ta un compania perteneciendo na Arubus. Nan tin 25 empleado den servicio, parti entre parkeerwachters y personal administrativo. AruParking ta maneha riba 1300 parkeerplaats den henter e area di Oranjestad, di cual mas o menos 800 ta pa clientenan cu ta bishita e area pa haci compras of haci respondi. E resto di espacio ta reserva pa empleadonan den e area, cu no necesariamente mester staciona nan auto mucho cerca debi cu nan auto ta keda ey pa mas di 8 ora largo. Mester paga di dialuna pa diasabra entre 7:00am pa 7:00pm.