Croes: Gremionan comercial 100% cu gobierno riba cambio ley laboral

ORANJESTAD - Gremionan comercial ta apoya e proposicion di minister di Labor Paul Croes, pa elimina articulo 1613X di nos codigo civil 100%! Asina e mandatario su ministerio ta bisa via un comunicado e fin di siman aki como reaccion na e ponencia di sindicato FTA riba e tema aki. Segun e ministerio, den tripartiet esaki a wordo discuti ampliamente y ta sigura cu ‘e cambio aki lo no tin efecto riba contratonan actual’. “E impresion ey mester wordo kita for di mesa. Tur contratonan (vast) actual lo keda vigente. E cambio aki lo crea oportunidad pa mas hende haya un trabou. Hendenan cu no ta trahando y ta haya trabou dificilmente, e cambio aki ta duna espacio na e dunado di trabou pa emplea esnan aki” e ministerio ta sigui bisa.

DOELGROEP

Por pensa riba 50-plussers, hobenan cu lo kier traha pa periodonan cortico, hobenan cu ta termina e leerwerk traject, hendenan cu ta saliendo di bijstand y mester un empleo y tur persona cu no tin trabou actualmente. Aruba ta e unico pais den Reino cu no tin e opcion pa contratonan pa tempo defini (kortlopende contracten). “Gobierno den esaki ta kere mescos cu e gremionan comercial AHATA, WAB, ATIA y SNBA cu e cambio aki lo tin efecto positivo pa tur hende cu no tin trabou actualmente” e ministerio a sigui bisa.

REACCION DIRECTO

E mandatario mientrastanto den un reaccion directo, a bisa cu finalmente ta Parlamento lo mester dicidi riba e cambionan aki . "Cu un persona no por bai Banco cu un contrato di 8 luna kizas ta berdad. Pero si e persona aki no tin trabou tampoco e por bai Banco. E cambio aki ta crea oportunidad pa esnan cu no tin trabou at all, haya e chens aki y demostra nan talento. Un bon trahado, un biaha mas, ningun doño di trabou lo kier perde. Actualmente tin un concurencia grandi pa mantene un bon trahado na trabou", Croes a sigui bisa. Banda di esaki Minister a splica cu na Aruba e proposicion ta pa maximalisa e periodo cu por cera un contrato pa tempo defini na 2 aña. Kiermen bo no por bai keda prolonga e contratonan aki pa largo. Despues di e 2 contrato bo ta haya bo contrato pa tempo indefini (vast). "E cambio aki NO tin ningun efecto negativo riba e contratonan (vast) actual, esaki ta un mal informacion di FTA cu nan ta divulga of ta interpreta", Croes a finalisa bisando.

FTA TA PROTESTA CONTRA E CAMBIO

E proteccion di trabou fiho pa un trahador ta na peliger, segun sindicato FTA.  Y despues di e ultimo tripartiet riba e topico di cambio di ley laboral (specificamente eliminacion di articulo 1613X for di Codigo Civil) tin un impasse entre gremio sindical, comercial y gobierno. Manera cu NoticiaCla.com a relata anteriormente riba e tema, sindicato FTA tin problema cu e intencion di gobierno pa elimina e articulo 1613X for di e Codigo Civil, y asina complace gremionan manera WAB, ATIA y AHATA. Y tin indicacion segun FTA, cu gobierno ta sostene e gremionan. De hecho, segun abogado di e sindicato, Hose Figaroa, esey tabata hopi cla durante e tripartiet riba e tema.

PROTECCION PA TRAHADO

Tin un proteccion den ley actual pa e trahador, cu ta sigura cu solamente den cierto situacion por tuma e trahador a base di un contract di trabou defini. Specificamente e ley ta menciona 4 situacion, manera si tin necesidad di trahador temporario pa un parti di aña (high season), reemplazo temporal di un trahador, ehecucion di un proyecto temporal, y si ta trata di trabounan los/no structura.

GOBIERNO KIER CAMBIO

Problema segun Hubert Dirksz, presidente di FTA ta, cu gobierno kier cambia esaki y crea e posibilidad cu pa tur circumstancia, por tuma hende a base di contract di trabou defini, cu ta pone cu e trahador no tin un siguransa di trabou, y no por bira ‘vast’. Den e caso aki, e trahadornan por haya maximo tres contract di p.e 8 luna, despues di cual e dunador di trabou cada fin di contract por evalua si e trahador por sigui cu e contract of por termina esaki.

SKINA DI GREMIO COMERCIAL

Dirksz a confirma tambe cu ta for di skina di gremionan comercial e grito ta bin, particularmente WAB (contratista den sector di construccion) for di aña pasa. A haci cierto concesion, pero no den forma di un ley, pasobra e ta algo cu ta regarda tur trahador y no e grupo specifico aki.

SIGURA TRABOU

Un problema cu sindicato FTA tin ta cu e trahador cu tin un contract di trabou pa defini de hecho nunca no por sigura su mes financieramente pa medio di un prestamo na banco, hipoteca, of algo otro cu banco ta exigi un periodo mas largo di trabou.

REACCION DI GOBIERNO

Gobierno ta wak e asunto otro, y cu esaki ta pa un grupo specifico, manera 50plussers, y hobenannan cu mester di un trabou pa un periodo, sin cu e ta mara e dunador di trabou cu despues di 2 luna, e persona mester keda. Segun minister encarga di labor Paul Croes, e no por kere cu un dunador di trabou lo actua cu mente maligno y cu tin e mente cu kier kita trahador facil. E ta mira cu e si un trahador ta bon, dificilmente e dunador di trabou ta bay lag'e bay. Pues minister ta wak e asunto aki cu un diferente wowo, y no ta mira e problema den e asunto aki. Segun Croes, e cambio aki ta duna e dos ‘doelgroepen’ e chens pa tambe integra den nos sector laboral. Y asina ta duna posibilidad pa mas hende por haya un trabou y cu esaki mester por cu e cambio di ley.