Schwengle: A cuminsa cu implementacion di inspectie independiente

ORANJESTAD - A cuminsa cu implementa un inspectie independiente di cuido y salud na Aruba. Un departamento di Inspeccion independiente, pues cu no ta cay bou di Directie Volksgezondheid, tabata un deseo pa hopi tempo na Aruba. Cu e presentacion di e plannan na Minister Dr. Alex Schwengle e siman aki a duna inicio oficialmente na e implementacion di e Inspeccion Independiente aki.

OPRICHTINGSGROEP

Minister Schwengle a splica cu a cuminsa cu un “oprichtingsgroep” cu representantenan di Directie Volksgezondheid, e Afdeling  Inspectie, Ministerio di Salud Publico, Departamento di Recurso Humano y Directie Wetgeving. E grupo a conclui cu si kier establece e inspeccion mas lihe posibel nan mester di asistencia. Nan a organisa un destaho y esaki a wordo gana pa KPMG. E compania aki a percura pa traha e planning pa cu e Inspectie. Entretanto Parlamento di Aruba a acorda tambe pa e fondonan wordo poni disponibel pa realisacion di e departamento.

INSPECTIE TA NECESARIO

Inspectie ta un departamento sumamente importante y necesario y ta calcula cu lo tuma un aña pa e ta “in place”, e mandatario a bisa, y den transcurso di añanan lo percura pa perfeccion’e. Inspeccion di Salubridad di Aruba, lo ta trahando cu inspeccion di Corsou, Sint Maarten y Hulanda y lo bin den futuro tambe un Memorandum of Understanding entre e inspectienan di e islanan, segun Minister Schwengle ta splica. Inspeccion di Salud tin como meta pa controla y consecuentemente pa medio di e control garantisa calidad di cuido (medico) na Aruba.

CONTROLA Y EXIGI CALIDAD

Loke Inspectie lo haci ta controla y exigi calidad den e ramo di cuido (medico). Si haya cu un proveedor no ta duna e calidad adecua lo yud’e drecha su calidad, y e proveedornan cu nenga di drecha nan cuido lo wordo exclui di participacion na e veld, Minister Schwengle a subraya. Calidad ta algo dificil pa splica y defini; loke ta identifica calidad ta ora cu tur hende, of casi tur hende ta bisa cu algo ta bon y e tin balor pa tur hende; e mester ta algo cu tur hende ta carga.

REGLA DI CALIDAD

Lo bin cu cierto reglanan pa cu calidad y lo traha cu loke e veld ta haya ta calidad y loke e consumidor ta haya ta bon calidad. Esaki tin di haci cu e forma cu e cuido ta wordo duna, e nivel di e cuido y e contenido di e cuido. Ora cu mayoria persona ta contento cu e cuido por bisa cu e cuido ta di bon calidad.

CRITICA RIBA MAL SERVICIO

Minister Schwengle a splica cu actualmente tin hopi critica, y tanten cu un bon parti di esaki tin su base, un parti tambe no ta klop cu e realidad pa falta di informacion na pueblo. Tin hopi factor cu ta determina pakico e cuido no ta bon ainda, e tin di haci tanto cu e mundo profesional como cu e consumidor. E percepcion di e consumidor tin biaha tampoco ta corecto.

YEGA NA UN LIÑA

E minister a bisa cu pa yega na un liña y pa tur hende yega na unda mester yega, lo traha riba 1) E control di calidad y definicion di calidad; esta kico e veld medico tin di cumpli cu ne y na mes por midi nan mes tambe si nan ta cumpli cu e reglanan of no; y 2) Lo tin un plataforma pa informacion y educacion di pueblo pa tur hende sa kico ta corecto y e plataforma lo sirbi tambe como “klankbord” unda por tende di pueblo tambe kico no ta bon pa por transferi e informacion den maneho pa mehora calidad.