Cobransa di N.V. ELMAR tin informacion mas detaya

ORANJESTAD - Den cuadro di e maneho di N.V. ELMAR, pa ta mas inovativo y eficiente den su servicionan na cliente, a introduci un recibo mas detaya den e formato di un statement. Den esey ta brinda clientenan mas informacion, mas facil pa compronde y ta yuda clientenan sigui nan uzo mensual di e ultimo lunanan. E team di e departamento di Servicio na Cliente ta trahando duro pa mehora e servicio pa medio di e implementacion di e sistema nobo di informacion di cliente y recibo.

INFORMACION MAS DETAYA

E statement cu informacion mas detaya, cu a sali pa prome biaha na october, ta forma parti di e imagen nobo di nos compania nacional di distribucion di coriente, cu awor tin un logo nobo, colornan nobo y ta cambiando e apariencia interno den tur su oficinanan y sucursalnan situa den Wilhelminastaat, na Hato y na San Nicolas.

BALANSA HABRI AINDA

E statement ta ilustra primeramente e balans cu ta habri ainda. Tambe ta ilustra si en caso e balans aki mester wordo cancela inmediatamente pa preveni cu ta desconecta suministro di coriente.

LESA METERSTAND

Di un manera mas detaya y comprendibel e cliente por tin un bista riba e “meterstand” anterior, e “reading” actual y e comportacion di uzo di coriente na cas of na oficina. Tambe e cliente por monitor si su meter a wordo lesa. E “Total Account Balance” na final ta duna un bista di e suma completo cu ta habri ainda incluyendo e suma di e luna en cuestion.

CONSUMO DI CORIENTE

E statement tambe ta duna informacion di e consumo di coriente durante e lunanan anterior y ta spera cu esaki lo ta un yudansa pa clientenan cu ta haciendo un extra esfuerso pa spaar coriente y mantene un presupuesto tur luna. Pa mas informacion tocante e statement por bishita www.elmar.aw bao di ‘Understand your Statement’.

NUMBER DI CUENTA NOBO

E compania ta pidi clientenan pone extra atencion tambe riba nan number di cuenta nobo (“Account Number”). Esaki ta particularmente importante na momento di haci un pago riba nan cuenta pa medio di “online banking”, na banconan comercial y Hulpbestuurskantoornan di Gobierno, como tambe na oficinanan di N.V. ELMAR mes.